PEQATAANEQ Inunnut Innarluutilinnut sapaatip akunneqartitsinermi 41-mi sammineqassaaq

Peqataaneq ima isumaqarpoq, kikkut tamarmik ataatsimoornermut peqataanerat.

Inuit innarluutillit Kalaallit Nunaanni sumiluunniit najugaqarput. Inuit innarluutillit innarluuteqaannanngillat innarluuteqarnertilli piinnarnagu allarpassuarnik imaqarlutik.
Inuit innarluutillit – inersimasut meeqqallu – inuiaqatigiinni, suliffeqarfeqarfimmi, inooqataanermi, timersoqatigiiffinni, ilinniagaqarfinni, meeqqat atuarfiini, ullukkut paaqqinnittarfinni peqataarusuttorujussuupput – aap TAMANUT ilaarusupput.

Taamaattumik Inunnut Innarluutilinnut sapaatip akunneqartitsinermi 41-mi 2019-imi PEQATAANEQ sammineqassaaq.
Inuit innarluuteqanngitsut inuit innarluutillit inuunerannut, taamatullu inuit innarluutillit innarluuteqanngitsut inuunerannut akuunissamut tikilluaqquneqarput, taamaalilluta
tamatta ataatsimoorneq misiginiassagatsigu paasillugu tamatta inuusugut nukissaqarluta unammilligassaqarlutalu.

Taamaattumik illit Inunnut Innarluutilinnut sapaatip akunneqartitsinermi 41-mi aaqqissuussisinnaalerputit, tassani kikkulluunniit tamarmik – inersimasut meeqqallu – ataatsimoornissamut qaaqquneqassallutik.

• Illit sumiiffinni timersortartut klubbianni piumassuseqarluarlutit suliaqartartuuguit, tassani inuit – meeqqanut inersimasunulluunniit namminneq pisinnaasatik aallaavigalugit klubbip sungiusartitsinerani peqataanissamut qaaqquneqarnissaannut aaqqissuussinissamut aningaasanik atugassanik qinnuteqarsinnaavutit. Nuummi Lykkeliga qanoq aallartissimanersut atuaruk uani.

• Suliffeqarfiuteqaruit siumut isiginnittoq imaluunniit – pisortaaguit, taava inuit innarluutillit suliffeqarfinnut pisiniarfiutinnulluunniit qaaqqusinnaavatit, qanorlu ilinnut neqerooruteqarsinnaanersut tusarlugu.

• Illit inuit innarluutillit peqatigiiffiani ilaasortaaguit eqeersimaartoq, taava illit sumiiffimmi najugaqarfigisanni innuttaasut, peqatigiiffissinni sunik sulerisarnersi pillugu misigisaqarnissaannut aningaasanik atugassanik qinnuteqarsinnaavutit.

• Immikkut atuartinneqartartunut ilinniartitsisuuguit, taava atuarfimmi sunik suliaqartarnersi pillugu takutitsinissassinnut aaqqissuussinermut illoqarfimmi imaluunniit nunaqarfinni innuttaasut qaaqqusinnaavatit.

• Sumiiffinni ilinniarnertuunngorniarfimmi, inuussutissarsiornermut ilinniarfimmi imaluunniit ingerlaqqiffiusumik ilinniarfimmi ilinniarneq pillugu ilitsersuisartuuguit eqeersimaartoq, taava inuusuttut inersimasullu innarluutillit ilinniagaqalernissaminnik kissaateqartut ilinniarfimmut tamanut ammasumik qaaqqusinnaavatit.

• Inuuguit innarluutilik nuannerluinnaqqissaartoq, illit nammineq imaluunniit angajoqqaavit illit innarluuteqarlutit inuunerit pillugu oqalugiarnissannut/-nissaannut aaqqissuussinermut aamma sumiiffimmi najugaqarfinni sunik tunniussaqarsinnaanerit pillugu oqalugiarnissamut aningaasanik qinnuteqarsinnaavutit/-si.

• Peqatigiiffimmut ilaasortaaguit peqatigiiffissinni sunik suliaqartarnersi pillugu inuit innarluutillit paasiniaanissaannut – aamma inuit innarluutillit peqatigiiffissinnut sunik tunniussaqarsinnaanerat ilanngullugu paasisaqarnissaq siunertaralugu
aaqqissuussinissamut aningaasanik qinnuteqarsinnaavutit.

Allatut oqaatigalugu – inuit akornanni aaqqissuussinissamut, inuit innarluutillit innarluuteqanngitsullu pinnguaqatigiinnissaannut, pisuttuaqatigiinnissaannut, eqqumiitsulioqatigiinnissaannut, skaterbanelioqatigiinnissaannut imaluunniit allamik sammisaqarnissamut aaqqissuussinissamut aningaasanik uani qinnuteqarsinnaavutit:

Pitsaaliuinermut Isumaginninnermut Aqutsisoqarfik Inunnut Innarluutilinnut sapaatip akunneqartitsinermut 41-mut aningaasanik agguaavoq.



Attaveqarfissaq
Paasisaqarnerorusukkuit naalakkersuisup allattaa Pitsaaliuinermut Isumaginninnermullu Aqutsisoqarfik e-mailikkut: IASS@nanoq.gl atorlugu attavigiuk