Kalaallit qallunaallu akornanni meeqqat ukkataralugit suleqatigiinneq

Kalaallit Nunaanni meeqqat tamarmik toqqissisimasumik, peqqissumik pitsaasumillu meeqqatut inuuneqarnissaminnik pisinnaatitaaffeqarput. Kalaallit Nunaanni suliniuteqarnerit patajaallisarneqarnissaannut ippassaq Folketingi 2019-ip sinneranut atorneqartussanik 5,3 mio. kr.-inik immikkoortitsivoq.

Ippassaq 2019-ip sinneranut atorneqartussanik 5,3 mio. kr.-inik Folketingi immikkoortitsivoq, taakkulu ilaatigut makkununnga atorneqassapput:
• Pinasuartumik sulisussat, isumaginninnermut siunnersortinik, tarnip pissusaanik ilisimasalinnik aamma ilaqutariinnik katsorsaasartunik inuttaqartut, Tasiilami meeqqat inuusuttullu navianartorsiortut pillugit sullissinermi malitseqartitsinermilu ikiuussinnaasut.
• Kalaallit Nunaani tamarmi meeqqanut inuusuttunullu kinguaassiuutitigut atornerlunneqarsimasunut katsorsaanissamik suliniuteqarnermik patajaallisaaneq.

Pitsaaliuinermut Isumaginninnermullu Aqutsisoqarfimmit suliniutinut arlalinnut neqeroorutigineqartunut imaluunniit aallartinneqareersunut ataani taaneqartunut, suliniutit pineqartut ataqatigiissillugit isiginiarneqassapput:
• Ingerlaavartumik kommuninik siunnersuineq, tassani piginnaanngorsaqqiineq siunersiueqatigiissitsisarnerlu ukkatarineqarlutik.
• Meeqqat peqataatinneqartarnerat meeqqallu oqaloqatigineqartarnerat pillugit kommunini tamani piginnaanngorsaqqiineq
• Kinguaassiuutitigut atornerluisoqarsimatillugu suliani kommunini ikorfartuinissanut suleqatigiinnik pilersitsineq
• Meeqqat Ikiortigit suleqatigalugu killiliisarneq pillugu ilinniutinik ineriartortitsineq
• Angajoqqaanik ilinniartitsinerup MANU-p Tasiilami ingerlanneqarnera
• Killiliisami Maligassiuisut pilersinneqarnerat, taakku nuna tamakkerlugu angalasarput
• Inunnut kannguttaatsuliornissamik eqqarsaateqartunut sulili kannguttaatsuliorsimanngitsunut nunamut tamarmut kinaassutsimik isertorluni tapersersorneqarneqarsinnaanermik- katsorsarneqarsinnaanermillu neqerooruteqarnissamik ineriartortitsineq
• Meeqqanut inuusuttunullu meeraqatiminnut inuusuttoqatiminnullu kannguttaatsuliorsimasunut suliniutit
• Suliniutissat ineriartortinneqarnerini piffinni pissutsit aallaavigineqarnissaasa ukkatarineqartarnerat
• Innuttaasunut internettikkut quppersakkamik pilersitsineq, tassani peqqinnerusumik inuuneqarnissaq ukkatarineqarluni
• Tusaanngap ammasarfiisa sivitsornerat
• Tunumi Tusaannga-p pilersinneqarnera

”Danmarkimit ikiuineq, Pitsaaliuinermut Isumaginninnermullu Aqutsisoqarfimmit suliniutit aamma kajumissuseq aallaavigalugu suleqatigiinnit suliniuterpassuit allartinneqarsimasut tamarmik imminnut pitsaasumik tapertariipput. Meeqqat amerlasuut inuunerminni atugaannik pitsanngorsaaniarluta suliaqaratta tamannalu misigiumaaraat neriuutigaara” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq nangillunilu “unammilligassat annertuujummata nalunngilara, taamaattoq ajunngitsumut ingerlagatta upperaara. Meeqqanut inuusuttunullu Tasiilami kinguaassiuutitigut atornerluisarneq pillugu politiit maannakkorpiaq nalunaarusiaminni innersuussutigisaannut suliniutit aallartinneqareersut naapertuummata aammattaaq maluginiarpara”
.

Tasiilami Kalaallit Nunaatalu sinnerani meeqqat inuusuttullu navianartorsiortut pillugit pissutsit piffissaq ungasinnerusoq isigalugu qanoq ililluni pitsanngorsarneqarnissaat pillugu Politiit nalunaarusiaanni maannakkorpiaq saqqummiunneqartumi innersuussutigineqartut Kalaallit Nunaanni Danmarkimilu oqartussaasoqarfiit assigiinngitsunik suliallit akornanni suleqatigiinnermi ilanngunneqarumaarput.


Attaveqarfissaq
Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqarasuaat + 299 554160 atorlugu attavigiuk