Takornariartitsisarneq pillugu saqqummersitsinermut pingaarutilimmut nunatsinniit peqataasorpassuit

Kalaallit Nunaanni takornariaqarneq ukiuni makkunani ingerlalluartorujussuuvoq. Umiarsuarnut takornariartaatinut ilaasut 2016-imiit 2018-imut 89%-inik amerleriarsimapput. Ilutigitillugu takornariarpassuit ukiuni aggersuni tikittalertussat inissaqartinniarlugit illoqarfinni arlaqartuni akunnittarfinnik sanaartortoqarpoq.

Siuariartorneq tamanna Nunat Avannarliit Killiit takornariartitsisarneq pillugu ukiumoortumik saqqummersitsineranni Savalimmiuni ingerlanneqartumi ersersinneqarpoq. Kalaallit Nunaanni takornarialerisut 32-it peqataapput. Nunat Avannarliit Killiit Savalimmiuni saqqummersitsisarneranni Kalaallit Nunaannit taamak amerlatigisunik siusinnerusukkut peqataasoqartarsimanngilaq. Takornariartitsisarneq pillugu saqqummersitsinermi Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane aamma Visit Greenlandip pisortaa Julia Pars peqataapputtaaq.

Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane oqarpoq: ”Takornariat Kalaallit Nunaannukartartut amerliartornerat takusinnaavarput. Takornariat suli amerlanerusut nunatsinnukartinniarlugit sulissuteqarnerup ingerlatiinnarnissaa taamaammat pingaaruteqarpoq. Taamaammallu nuannaarutigeqaara Nunat Avannarliit Killiit saqqummersitsineranni Kalaallit Nunaanniit peqataasut taamak amerlatigimmata”.

Nunat Avannarliit Killerni takornariaqarnermik suleqatigiinneq nukittunerulersinniarlugu Inuussutissarsiornermut, Nukissiuuteqarnermut Ilisimatusarnermullu Naalakkersuisup Jess Svanep Savalimmiuni Niuernermut Avatangiisinullu Naalakkersuisoq Helgi Abrahamsen Islandimilu Takornariaqarnermut, Inuussutissarsiornermut Nutaanngorsaanermullu ministeri Þórdís Kolbrún Reykfjörð Gylfadóttir ataatsimeeqatigai. Ataatsimiinnermi nunap immikkoortuini nungusaataanngitsumik tunngaveqarluni takornariartitsinerup ataatsimoorluni ineriartortinneqarnissaa pingaartillugu oqaluuserineqarpoq.

Saqqummersitsinermi Kalaallit Nunaanni takornarialerisut Savalimmiuni Islandimilu ingerlatseqatigiiffippassuit ataatsimeeqatigisarpaat. Saqqummersitsivimmi suleqatigiinnissamut periarfissat suliniutillu nutaat sumi tamaani oqaloqatigiissutigineqartarput. Tamakkulu tamarmik Kalaallit Nunaanni takornarianut pissanganartunik amerlanerusunik sammisassaqartitsilissapput soqutiginnilersitsillutillu.

Visit Greenlandimi pisortaq Julia Pars oqarpoq: ”Kalaallit Nunaanni takornariaqarnerup ukiuni makkunani siuariartornera ersarilluinnarpoq. Kalaallit Nunaanni takornarialerisut Nunat Avannarliit Killiit saqqummersitsinerannut peqataanermikkut tunisassiamik soqutigineqartorujussuunerat misigaat. Kalaallit Nunaata nunani tamalaani nittarsaanneqarnerata ingerlaannarnissaa ukiuni tulliuttuni taamaammat ingerlatiinnassavarput”.

Nunat Avannarliit Killiit saqqummersitsinerat NATA-mit (North Atlantic Tourism Association) ukiut tamaasa aaqqissuunneqartarpoq, NATA-lu suliniaqatigiiffiuvoq Nunani Avannarlerni Killerni – Kalaallit Nunaat, Island Savalimmiullu - takornariaqarnermik siuarsaanermik tapersersuinermillu suliaqartoq. Nunat Avannarliit Killiit saqqummersitsisarnerat 1986-imili ingerlanneqartarpoq, nunallu pingasut paarlakaajaallutik saqqummersitsinerup ingerlanneqarnissaa akisussaaffigisarpaat.

Saqqummersitsinermi Kalaallit Nunaanni takornarialerisut amerlasuut peqataapput – katillugit 32-it – soorlu aamma Visit Greenland Air Greenland-ilu peqataasut. Saqqummersitsinermi aaqqissuussinerit pingaarnerit tassaasarput suliffeqarfinnik amerlasuunik ataatsimeeqateqartarnerit, taakkunani takornarianut tunisassianik pisiniat tuniniaasullu isumaqatigiissuteqarnissat siunertaralugit naapeqatigiittarmata.


Paasisaqarnerunissamut attavissat:

Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik, tlf. +299 34500, e-mail: isiin@nanoq.gl

Visit Greenlandimi pisortaq Julia Pars, tlf: +299 342831 e-mail: julia@visitgreenland.com