Anda Kuitsemut eqqaaniut

Aliasuutigeqisatsinnik kulturikkut inuk malunnaatilik ilisimaneqarluartoq inngertartoq Anda Kuitse arfininngornermi septembarip 21-ani 2019 toqukkut qimagunnera pillugu nalunaarut tiguarput. Kulusumi 1951-mi inunngorpoq, angajoqqaaralugit inngertartut Miilikka aamma Vilhelm Kuitse.

Kalaallit Nunaanni issittunilu Inuit akornanni ileqqutoqaavoq inngerneq. Taamaammat
kulturitoqqamik ersertitsinerit ilaat tassaavoq inngerneq.

Anda Kuitsep eqqaamavaa pingasunik sisamanilluunniit ukioqarluni angajoqqaani inngertut isiginnaarlugit. Nammineq inngerneq 1972-mi misileqqaarpaa. Kingornalu sulissutigisimavaa kalaallit kulturikkut kingornussaanni qitiulluinnartut ilaat inngerneq attatiinnarneqarnissaa, kinguaariinnut nutaanut ingerlateqqinneqarnissaa aammalu tammatsaaliorneqarnissaa. Tamannalu nunanut assigiinngitsunut angalassutigisarpaa.

Anda Kuitsep inngerutit ataataminit kingornussarai, taassuma aamma siuliminit kingornussaralugit. Nutaanik inngerutinik pilersitsineq ajorpoq, taamaasillunilu inngerutit nutaanngitsut annertuumik tammatsaaliorpai qularnaarlugillu eqqaamaneqarnissaat. Nunami maani nunanilu tamalaani kulturikkut allatigulluunniit aaqqissuussanut peqataasarpoq, inngernermik ilinniartitsisarpoq, aammalu takornarissanik inngernermik takutitsisarluni.

Anda Kuitsep eqqaamaneqaatigissavaa inngerutitoqqanik nunatta kangianeersunik ingerlatitseqqiisutut tammatsaaliuisutullu annertuumik suliaqarsimanini.

Anda Kuitsep peerunneratigut Kalaallit Nunatsinni inummik imaannaanngitsumik annaasaqarpugut maqaasissavarpullu.

Ilaqutaasunut misiginneqatiginninnerput ingerlateqqipparput.

Eqqaaneqarnera ataqqinartuuli.

Naalakkersuisut sinnerlugit, Naalakkersuisunut ilaasortaq Ane Lone Bagger