Kalaallit Nunaanni meeqqanut inuusuttunullu navianartorsiortunut pinasuartumik ikiorsiinissamut qallunaat naalakkersuisuisa 5,3 mio. kr.-it qulakkeerpaat

2019-imi pinasuartumik suleqatigiittussanut aningaasat atorneqassapput, Tunumi Tasiilami meeqqanut suliassaqarfimmi suliassat suliarineqanngitsorpassuit ikilisarneqarnissaat taamaalilluni ikiorsiivigineqassalluni

Meeqqat inuusuttullu navianartorsiortut pillugit suleqatigiinnerup patajaallisarneqarnissaanik  kalaallit oqartussaasuisa kissaataat akuersaarniarlugu, tassani meeqqat inuusuttullu kinguaassiuutitigut atornerlunneqarsimasut imaluunniit nakuuserfigineqarsimasut aamma ilaallutik, qallunaat naalakkersui maanna siullermik alloriarput.

2019-imi pinasuartumik ikiuinissamut atugassanik ullumi Folketingi 5,3 mio. kr.-inik immikkoortitsivoq.  Ilaatigut misiligutitut suliniummut, Naalakkersuisut aallartinneqartussatut kissaatigisaannut, aningaasat atorneqassapput. Misiligutitut suliniut sulianut ilinniarsimasunik pinasuartumik sulisussanik inuttaqassaaq, taakkulu ilaatigut Tunumi Tasiilami, sulianik sullissinermi malitseqartitsinermilu Kommuneqarfik Sermersooq ikiorsinnaavaat.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ima oqarpoq:

“Meeqqanut inuusuttunullu Danmarkip ikiuinera qujassutigaarput.  Meeqqanut inuusuttunullu suliassaqarfimmi unammilligassat tamaasa ataatsikkut aaqqiivigisinnaanngilagut.  Tasiilaq aallartiffigivarput.  Danmarkimit pinasuartumik suliniuteqarnikkut Tasiilami meeqqat inuusuttullu navianartorsiortut amerlasuut ikiorneqassapput.  Kalaallit Nunaata sinnerani meeqqat inuusuttullu navianartorsiortut pillugit sullissinermi Tasiilami misilittakkat atussavagut.”

Social- og indenrigsministeri Astrid Krag oqarpoq:

  • Meeqqat inuusuttullu innarlerneqarsimasut sukkanerpaamik ikiorneqarnissaat pillugu Naalakkersuisut kissaataat akuersaassallugu qallunaat naalakkersuisuinut pingaaruteqarpoq.  Suliassat meeqqanut tunngasut suliarineqarsimanngitsut ikilisinniarneranni 5,3 mio. kr.-it atorlugit ikiusinnaagatta, aamma meeqqanut suliassaqarfimmi suleqatigiinnerup patajaallisarneqarnissaanut alloriarneq siulleq tigusinnaagatsigu taamaammat nuannaarutigisorujussuuara.

2019-imi pinasuartumik ikiuinerup saniatigut Kalaallit Nunaata Danmarkillu akornanni oqartussaasoqarfiit assigiinngitsunik suliallit akornanni sulineq aallartissallugu qallunaat naalakkersuisuisa Naalakkersuisullu aalajangerpaat, tassani suliassaqarfik misissueqqissaarfigineqassalluni kiisalu 2020-imi ukiup affaani siullermi piffissaq ungasinnerusoq eqqarsaqatigalugu Tasiilami Kalaallit Nunaatalu sinnerani meeqqanut navianartorsiortunut pissutsit pitsanngorsaavigineqarnissaat pillugit qanoq iliuusissanik innersuussisoqassalluni.

 

Eqqortut:

  • Isumaginninnermut suliassaqarfik Kalaallit Nunaata tigunikuuaa taamaammallu Kalaallit Nunaanni meeqqanut suliassaqarfik akisussaaffigalugu.
  • Upernaaq piviusulersaarusiaq “Byen hvor børn forsvinder” DR-ip takutippaa, tassani Tasiilami meeqqat inuusuttullu sumiginnarneqarsimasut imaluunniit innarlerneqarsimasut naammattumik ikiorserneqarneq ajortut ukkatarineqarpoq.
  • 2019-imi aasaagaa Kommuneqarfik Sermersuumi nalunaaqqaarani nakkutilliiartornerup takutippaa suliassat nalunaarutiginninnerillu suliarineqarsimanngitsut 520-iusut, taakkulu ilaat suliassat 201-iusut isumaginninnikkut misissuinermik aallartitsinissamik aalajangiiffigineqarsimasut, taamaattorli misissuinerit aallartinneqarsimanngitsut.

5,3 mio. kr.-it taakku makkununnga atorneqartussatut naatsorsuutigineqarpoq:

  • Pinasuartumik sulisussat, taakkulu isumaginninnermut siunnersortinik, tarnip pissusaanik ilisimasalinnik aamma ilaqutariinnik katsorsaasartunik, Tasiilami meeqqat inuusuttullu navianartorsiortut pillugit sullissinermi malitseqartitsinermilu ikiuuttussanik, inuttaqassasut naatsorsuutigineqarpoq.
  • Kalaallit Nunaanni ilaqutariinnut paarsisartunut suliassaqarfimmik misissueqqissaarnissap ingerlanneqarnissaanut aningaasaliissutit
  • Meeqqanut inuusuttunullu kinguaassiuutitigut atornerlunneqarsimasunut katsorsaanermik suliaqarnerup annertusarneqarnissaanut aningaasaliissutit

Annertunerusumik paasissutissat

Tusagassiuutit pillugit sulisoq Nanna Lodberg Theut, tlf. 4185 1005, e-mail: nlot@sm.dk

Immikkut siunnersorti Charlotte Poole, tlf. 4185 1133, e-mail: cap@sm.dk

Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip allattaa Inger Heilmann Larsen: e-mail: ilha@nanoq.gl imaluunniit tlf. + 299 554160.