Suliffeqarfinni peqqissuni tarnikkut peqqissuunissaq ukkatarineqarpoq

Suliffeqarfinni peqqissuni tarnikkut peqqissuunissaq ukkatarineqarpoq

Inuulluarnissatsinnut atugarissaarnitsinnullu tarnikkut peqqissuuneq timikkut peqqissuunertulli pingaaruteqartigaaq. Suliffeqarfimminni tarnikkut peqqissuunissap atugarissaarnissallu siuarsarnissaanut suliaqarnissaminni ilisimasanik atortussaminnillu pissarsiniarlutik inuummarissaasut 34-it Sisimiuni 25. aamma 26. september katersuutissapput tarnikkut peqqissuunissamut ABC pillugu pikkorissarneqassallutik.

Tarnikkut peqqissuugaanni amerlanertigut imminut inuunerisamullu iluarisimaarinnittoqartarpoq, aamma allat ilagalugit sunniivigeqatigiittarnerni ajunngitsumik ulluinnarni inuusoqartarluni. Timi atorlugu iliuuseqarnikkut, peqatigiilluni iliuuseqarnikkut aamma pingaarutilinnik iliuuseqarnikkut tarnikkut peqqissuunerput pitsanngorsarsinnaavarput patajaallisarlugulu. Tarnikkut peqqissuunissamut ABC-p tamanna aallaavigaa.

Tarnikkut peqqissuunissamut ABC, Mental Sundhedsfremme pillugu Professor Vibeke Koushede-p Statens Institut for Folkesundhed-imeersup, ineriartortissimavaa, taannalu inuummarissaasunut pikkorissartitsinermi ilitsersuisuussaaq, Charlotte Meilstrup Post.doc.-iusup suliniummullu tarnikkut peqqisuunissamut ABC-mut aqutsisuusoq peqatigalugu.

Tarnikkut peqqissuunerup nukittunerulersittarpaatigut, aamma atugarissaarneq peqatigiilluta patajaallisarsinnaavarput. Sulisut atugarissaartut suliffeqarfimminnut nalilinnik pilersitsisarput, taamaakkamilu tarnikkut peqqissuuneq suliffeqarfinnut aamma Suliniut Suliffiit Peqqissuni suliassaqarfiuvoq erseqqissoq ukkatarisassarlu.

Suliffeqarfimmi tarnikkut peqqissuunissap siuarsarneqarnissaanut qanoq suleriaaseqassanerlutik inuummarissaasut ingerlaavartumik ujartuisarsimapput. Kissaatigineqartup tamassuma inuummarissaasut pikkorissarneqarneranni immikkoortukkuutaat pingajuanni naggataannilu akuerineqarsimanera Suliniummi Suliffiit Peqqissuni suleqatigiit nuannaarutigaat.

Ukiuni pingasuni misiliutaasumik suliniummi; Suliniut Suliffiit Peqqissut-ni CSR Greenland, Kalaallit Nunaanni Timersoqatigiit Kattuffiat aamma Peqqissutsimut Naalakkersuisoqarfik suleqatigiipput. Suliniummi naalakkersuisoqarfiup peqataanera Paarisamit isumagineqarpoq.

Suliniut Suliffiit Peqqissut-ni oqaatsit paasinnissutissat tassaapput: inuummarissaasunik ilinniartitsinissaq, periusissiugaasumik peqqinnissaq pillugu aqutsinerup aamma suliffeqarfinni peqqinnissaq pillugu suliniuteqarnerup atuutilersitsineq. Suliniut ataavartumik nalilersorneqartarpoq, aamma Statens Institut for Folkesundhed-imeersunik ilisimatusartunik ikiorneqarluni ineriartortinneqarluni, taakkulu suliffeqarfiit peqataasut sulisuinik peqqissuuneq pillugu annertoorujussuarmik misissuisimapput.

Ukioq naatinnagu suliffeqarfiit peqataasut suliffeqarfimminni peqqissuuneq pillugu nassuiaammik pissapput, tassani suliniuteqarfigisassanik aalajangersimasunik siunnersuusiortoqassalluni.

Misiliutaasumik suliniut 2019-imi naammassineqassaaq, tamatumalu kingorna Kalaallit Nunaanni Timersoqatigiit Kattuffiannut tunniunneqassalluni, taassuma siunissami inuummarissaasunngorniarnermut pikkorissaanerit neqeroorutigisalissavai.


Paasisaqarnerorusukkuit uku attavigikkit:

CSR Greenland: Allattoqarfimmi pisortaq Ulla Lynge Oqarasuaat.: +299 363714

Kalaallit Nunaanni Timersoqatigiit Kattuffiat: Ineriartortitsinermut siunnersorti, Aviaaja Geisler Oqarasuaat: +299 348156

Paarisa: Peqqinnissaq pillugu siunnersorti Kista Hammeken Lennert Oqarasuaat.: +299 345113