Inatsisitigut ataataqanngitsut tarnip pissusaanik ilisimasalimmik akeqanngitsumik oqaloqateqarsinnaanerat

Inatsisitigut ataataqanngitsut maanna tarnip pissusaanik ilisimasalimmut akeqanngitsumik sianersinnaalerput. Tarnilli pissusaanik ilisimasalimmik naapitsinissartik piumanerugunikku taamaaliorsinnaapput.

Inatsisitigut ataataqanngitsut tarnip pissusaanik ilisimasalimmik oqaloqateqartarnermikkut peroriartornerminni misigisamikkut artorsaatigilersimasatik oqaloqatigiissutigisinnaalerpaat. Oqaloqateqarnissamut neqeroorutit nutaat assut nuannarineqarput.

”Peroriartornerup nalaani pakatsisarnerit pillugit tarnip pissusaanik ilisimasalimmik inatsisitigut ataataqanngitsut uattulli ittut oqaloqateqarsinnaaleratta assut nuannaarutigivara. Oqaloqateqarsinnaanermut neqeroorneq inuppassuarnut iluaqutaajumaartoq ilimanarpoq. Tarnip pissusaanik ilisimasalimmit ikiorneqarsinnaaneq inatsisitigut ataataqanngitsut akornanni pilerigineqartarsimaqaaq” Tida Ravn, inatsisitigut ataataqanngitsunut ikiuisoqarnissaanik pisariaqartitsinermik arlaleriarluni uparuaasarsimasoq oqarpoq.

Inatsisitigut ataataqanngitsut oqarasuaatikkut namminerluunniit oqaloqateqarfissamut saaffiginninnermikkut tarnip pissusaanik ilisimasalimmit ikiorneqarsinnaapput. Inatsisitigut ataataqanngitsoq oqaloqateqarnissamut neqeroorfiup pingaarnertut oqarasuaatikkut normuanut (34 50 50) sianeruni, pineqartoq tarnip pissusaanik ilisimasalimmut pineqartup aalajangersimasumik pisariaqartitaanut naapertuuttumut oqaloqateqarnissamik innersuunneqassaaq.

Inatsisitigut ataataqanngitsunut tarnip pissusaanik ilisimasalimmik akeqanngitsumik oqaloqateqarsinnaaneq danskit Social- og Indenrigsministeeriaqarfiata aamma Isumaginninnermut Inatsisinillu Atuutsitsinermut Naalakkersuisoqarfiup suleqatigiinnerisigut periarfissaalerpoq.

Peqqissutsimut, Isumaginninnermut, Inatsisinillu Atuutsitsinermut Naalakkersuisup, Martha Abelsenip maanna oqaloqateqarsinnaanermut neqeroorut piareermat nuannaarutigaa.

”Inatsisitigut ataataqanngitsut assigiinngitsutigut meeraanertik nuanninngitsunik eqqaamasaqarfigivaat, taakkumi inuiaqatigiinni ajortumik pineqarlutik peroriartorsimapput. Taamatut peroriartorneq inuunerup sinneranut sunniuteqarsinnaavoq. Taamaammat kiisami inatsisitigut ataataqanngitsunut tarnip pissusaanik ilisimasalimmik oqaloqateqarsinnaanissamik neqeroorfigitissinnaalernerat nuannaarutigaara. Oqaloqateqarsinnaalerneq inunnut amerlasuunut iluaqutaajumaartoq neriuutigaara” Peqqissutsimut, Isumaginninnermut Inatsisinillu Atuutsitsinermut Naalakkersuisoq, Martha Abelsen oqarpoq.

Inatsisitigut ataataqanngitsut tarnip pissusaanik ilisimasalimmik akeqanngitsumik oqaloqateqarusuttut oqarasuaatip normuanut 34 50 50-imut pingasunngornikkut nal. 16:00-imiit 20:00-imut sianersinnaapput.

Paasissutissat allat facebookimi qupperneq ”Information om indsatserne til juridisk faderløse i Grønland” imaluunniit www.sullissivik.gl aqqutigalugit pissarsiarineqarsinnaapput.

Attavissaq
Paasisaqarnerorusukkuit Naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 554160 aqqutigalugit attavigiuk