Pinngortitaq pillugu nipilersuut nutaaq

Arfininngorneq nunarsuarmi pinngortitami eqqakkanik saliiffiuvoq. Tassunga aallarniutitut Pinngortitamut Avatangiisinullu Naalakkersuisoqarfiup erinarsuut nipilersukkamillu videoliaq ”Nunannguaq”, tamatsinnut pinngortitamik najukkatsinnik mianerinninnissamut kaammattuisussaq saqqummersippaa

Nipilersukkamik videoliaq paasititsiniaanermut ”Pinngortitap Paarsisui”-nut, meerarpassuarnit inuusuttorpassuarnillu ilisimaneqalereersumut ilaavoq. Paasititsiniaaneq kulturitsinni nunarsuarmillu paasinnittarnitsinni pinngortitap tarneqarneranik nalunngissuseqarluarnitsinnik aallaaveqarpoq. Pinngortitami pissutsit uumassuseqarput tarneqarlutillu, soorlumi inuit anersaaqartut tarneqarlutillu – tassalu ”inua”. Inuit pinngortitarlu imminnut atasuupput. Inuit pinngortitap oqimaaqatigiinneranik attassiinnarnissamut akisussaaqataapput, soorlumi tamanna Sassuma Arnaa pillugu oqaluttualiami oqaluttuarineqartoq.

René Brandt Løvstrømip Nunannguaq erinarsorpaa, taannalu qaammatini tulliuttuni Kalaallit Nunaat tamakkerlugu radiukkut, tv-kkut aamma Facebook-ikkut tusarsaalerumaarpoq. 

Nipilersukkamik videoliamut ilanngullugu siunnersuutitsialaat tallimat, ”Pinngortitap Paarsisui”-nut ikiuukkusuttunit malinneqarsinnaasut Pinngortitamut Avatangiisinullu Naalakkersuisoqarfiup saqqummiuppai.

Siunnersuutit tassaapput: 

1)      Igitassatit tamaasa angerlaatikkit saliilluarillu.

Pinngortitamiinninni kinguaavit tassaniissimanerit takusinnaanngippassuk aallaavik tamatigut pitsaasuussaaq. 

2)      Uumasut eqqarsaatigikkit.

Pingaartumik upernaakkut manniliortoqartillugu piaqqiortoqartillugulu uumasut eqqissisimanissartik pisariaqartittarpaat.

3)      Ikumatitat qamilluaruk.

Aamamininnguaq, igalaamineq cigaritsilluunniit kimmivikua pinngortitami ikuallatsitserujussuarsinnaapput, taamaattumik mianersorit.

4)      Tunisassianik avatangiisinut uloriananngitsutut nalunaaqutsikkanik pisigit.

Tunisassianik avatangiisinut uloriananngitsutut nalunaaqutsikkanik pisisaruit pinngortitamik immamillu akuutissanut ulorianartunut illersuinermi suleqataassaatit.

5)      Pinngortitap nukii ataqqikkit.

Issittumi pinngortitaq imaannaanngissinnaasarpoq silalu allanngoriataarsinnaavoq – tamatigut atisanik oqortunik taquassannillu nassartarit, aammalu sumunnarnerlutit, qaqugulu uternissat pilersaarutiginerlugu tamatigut oqaluttuussaqartarit.

Pinngortitap Paarsisui pillugit annertunerusumik paasisaqarusukkuit www.inua.gl pulaarsinnaavat

Annertunerusumik paasisaqarusunnermi attaveqarfissaq:

Pinngortitamut Avatangiisinullu Naalakkersuisoqarfimmi pisortaaneq Mette Skarregaard Pedersen, tlf. 529844 mesp@nanoq.gl.