Kangerlussuarmi Mittarfiup atorneqaannarnissaa pillugu Illersornissaqarfimmut tunngaviusunut isumaqatigiissuteqarneq

Kangerlussuarmi Mittarfiup atorneqaannarnissaa pillugu Illersornissaqarfimmut tunngaviusunut isumaqatigiissuteqarneq

Ineqarnermut Attaveqaqatigiinnermullu Naalakkersuisoq Karl Frederik Danielsen, Nunanut Allanut Naalakkersuisoq Ane Lone Bagger aamma Illersornissamut
Ministeri Trine Bramsen ulloq 18. september 2019 Illersornissaqarfiup Kangerlussuarmi mittarfimmik siunissami atuinissaa pillugu mittarfittaassallu 2023-mi naammassereernerini tunngaviusunut isumaqatigiissuteqarput.

Illersornissaqarfiup issittumi sumiiffinni suliassaasa suliarineqaannarsinnaanissaat siunertaralugu, Kangerlussuarmi mittarfiup Illersornissaqarfiup timmisartuinut atorneqaannarnissaa pisariaqartinneqarpoq.

Tamanna tunngavigalugu Illersornissaqarfiup Kangerlussuarmi mittarfimmiiginnarnissaa aammalu mittarfimmik atuisinnaanissaa, taamatullu mittarfiup timmisartunit innuttaasunut atorneqartartunit nalinginnaasumik atugassarititaasut atuuttut malillugit atorneqaannarnissaa illuatungeriit isumaqatigiissutigaat. Aammattaaq kalaallit mittarfimmik piginnittuunerisa allanngortinneqannginnissaa, qanorlu mittarfik Illersornissaqarfimmut atortinneqarsinnaajumaarnersoq pillugu najoqqutassiornissaq siunertaralugu ataatsimoorluni suliassanik aallartitsisoqassasoq isumaqatigiissutigineqarput.

Naalakkersuisoq Karl Frederik Danielsen oqarpoq: ” Aaqqiissutissaq illuatungeriinnut tamaginnut iluaqutaasussatut isumaqatigiissutigineqartoq nuannaarutigalugu maannakkut oqaatigisinnaavara. Taamatuttaaq Kangerlussuarmi innuttaasut nunaqarfimmi mittarfiup siunissaa pillugu maanna paasisaqarnerummata, nuannaarutigaara.”

Naalakkersuisoq Ane Lone Bagger oqarpoq: ”Naalakkersuisut aamma Illersornissamut Ministereqarfiup akornanni suleqatigiilluarnerup tamanna inerneraa. Nuannaarutigaarput tunngaviusunut isumaqatigiissusiassaq isumaqatigiissutigisinnaagatsigu, aammalu qularinngilara suliap ingerlaqqinnerani anersaaq pitsaasoq atorneqartoq ingerlaqqikkumaartoq.”

Illersornissamut Ministeri Trine Bramsen oqarpoq:

”Illersornissaqarfipput Naalagaaffeqatigiinni tamarmiusuni pingaarutilinnik, tamatta toqqissisimanissatsinnut iluaqutaasussanik suliaqarpoq. Taamaattumik nuannaarutigaara Namminersorlutik Oqartussat qanittumik suleqatiginerisigut aaqqiissutissamik, Illersornissaqarfiup Kalaallit Nunaanni eqqaanilu suliassaminik ingerlatsiinnarsinnaaneranut sinaakkutissanik qulakkeeriffiusinnaasunik isumaqatigiissuteqaratta. Aalajangiineq tamanna pingaaruteqarpoq aammalu Issittumi suliassanik salliutitsinitsinnut naqissusiilluni.”

Tunngaviusunut isumaqatigiissut atuarneqarsinnaavoq uani
Suliassanut tunngavissiaq atuarneqarsinnaavoq uani

Paasissutissanik amerlanerusunik paasisaqarusunnermi Naalakkersuisup allattaa Anders Samuelsen ansa@nanoq.gl imaluunniit tusagassiisarnermut siunnersorti Linda Liboriussen lil@fmn.dk aqqutigalugit attaveqarfigineqassapput