Eqqaamajuk kapisilittatit nalunaarutigisussaagakkit

Kalaallit Nunaanni Aalisarsinnaanermut Akuersissutinik Nakkutilliisoqarfiup, KANUAANA, pisanik nalunaarsuiffiata takutippaa sunngiffimmi inuussutissarsiutigalugu aalisartut septembarip 16-ani pisatik 11,5  tonsiusut nalunaarutigisimagaat. Ukioq manna kapisilittassiissutigineqartut 19,5 tonsiupput. KANUAANA-p kapisilinnik aalisarneq ingerlaannartumik unitsissavaa pisassiissutigineqartut tamakkerlugit aalisarneqarpata.

Taamaattoq Aalisarnermut, Piniarnermut Nunalerinermullu Naalakkersuisoqarfimmiit eqqaasitsissutigissavarput kapisilinniarneq pillugu nalunaarut naapertorlugu sunngiffimmi inuussutissarsiutigalugulu aalisartut kapisilinnik pisaqarnerit tamaasa   KANUAANA-mut pinngitsooratik nalunaarutigisussaammatigik, ugguuna gflk@nanoq.gl, Fax 34 63 60 imaluunniit Postboks 501, 3900 Nuuk.

Immersuiffissamut aamma nalunaarutigineqassallutik; immersugassaq uaniippoq

Nalunaarusiortussaatitaaneq
Kikkulluunniit kapisilinniarnissamut akuersissutaateqartut kapisilinnut qassutiminnik napitaajaareersimatillutik KANUAANA-mut pisatik pillugit nalunaarutigisussaavaat. Pisaqarsimanngikkaluaraanniluunniit nalunaarutiginnittoqartassaaq, nalunaarsuiffimmut 0-mik nalunaartoqassalluni. Kapisilinniarnissamut akuersissuteqartut aalisarsimanngikkaluarunilluunniit aamma nalunaartussaatitaapput, pisaqarsimannginnertik nalunaarutigisussaallugu.

Inuussutissarsiutigalugu sunngiffimmilu aalisartut kapisilittaminnik nalunaarsuisussaanertik naapertorlugu nalunaarsuisimanngippata, aappaaguani kapisilinniarnissamut akuersissummik tunineqarsinnaanngillat.

2019-imi kapisilinniarsimanerit pillugu nalunaarutiginnissimanngikkuit KANUAANA-mut nalunaarutiginnissinnaavutit, ugguuna gflk@nanoq.gl, Fax 34 63 60 imaluunniit Postboks 501, 3900 Nuuk.

Attavigineqarsinnaavoq Katrine Kærgaard, Aalisarnermut, Piniarnermut Nunalerinermullu Naalakkersuisoqarfimmi siunnersortit pisortaat. Email: katk@nanoq.gl