Naalakkersuisut nunat tamalaat Alaskami isumasioqatigiinneranni peqataasut

Naalakkersuisut nunat tamalaat Alaskami isumasioqatigiinneranni peqataasut

Aningaasaqarnermut Nunanilu Avannarlerni Suleqatigiinnermut Naalakkersuisoq Vittus Qujaukitsoq ulloq 12. september 2019-mi International Forum of Sovereign Wealth Funds (IFSWF) Alaskami Juneauimi aqqanilissaannik ukiumoortumik ataatsimiinnerani peqataavoq.

IFSWF-ip naalakkersuilluarnerup nittarsaannissaa aningaasaliisarnernilu nalinginnaasunik periutsit qaffassarnissaat siunertaraa. Suliniaqatigiiffik ukiumoortumik ataatsimiittarpoq, tassanilu nunani 30-ni aningaasaliisarnermut aningaasaateqarfiit politikerillu nunarsuarmi nunani amerlasuuneersut misilittakkanik paarlaateqatigiillutillu attaveqatigiillutik naapittarput.

Naalakkersuisoq annertuumik oqalliseqataanermi Issittoq; nunarsuup immikkoortua geopolitikimik suleqatigiinnermik toqqammaveqartumik qulequtalimmi peqataanissani immikkut siunertaralugu isumasioqatigiinnermi peqataavoq.

Oqalliseqatigiittuni Naalakkersuisup saniatigut uku peqataapput:
  • General David Petraeus, KKR Global Institutemi siulittaasoq kiisalu siusinnerusukkut the Central Intelligence Agency (CIA) pisortaasimasoq
  • USCG vice-Admiral Matthew T. Bell Jr, 17. Sinerissami nakkutilliisut immikkoortuanni 17-mi, U.S. Coast Guard qullersaq
  • Udaibir Das, international valutafond (IMF) assistant Director kiisalu aningaasanut aningaasanillu niuerfiit pillugit siunnersorti.
Oqallinneq Amerikamiut TV-anni aallakaatinneqarpoq linkimilu uani takuneqarsinnaalluni: https://youtu.be/JWQCAdWEv5s

Naalakkersuisup oqallinnermi issittumi issitullu eqqaani annertuumik nunarsuarmioqatigiit suleqatigiinnerisa attanneqarnissaannut pisariaqartitsineq erseqqissarpaa, taamatummi suleqatigiinneq, ingammik Issittumi isumalluutinik atuinermut tunngatillugu, Issittumi innuttaasut pisuussutinik atuinerni taamaattuni nammineerlutik pissusissamisoortumik aalajangiisussaatitaanerat aallaaviusariaqarmat, kiffaanngissuseqartumik ammasumillu suleqatigalugit pisariaqarmat.

Angalanermissaaq Alaskap guvernøriata Mike Dunleavyp naapinnissaanut aamma periarfissiivoq, taassumalu Kalaallit Nunaanik, Kalaallit Nunaallu pillugu ilisimasat annertuumik soqutigalugit oqaatigaa.

Taamattaarlu suliniaqatigiiffik iluanaarniarfiunngitsoq Marine Exchange of Alaska (MXAK) pulaarneqarpoq. MXAK-p imaani isumannaallisaanerup qaffassarnissaa siunertaraa. Suliniaqatigiiffiup teknikikkut malinnaanermik atortorissaarutit annertuut, satelliti nunamilu upalungaarsimaffiit 130-nit amerlanerusut atorlugit angallatinik alapernaarsuiffimmik pilersitsivoq, taakkulu assersuutigalugu imartanut navianartunut anngukkaangata, tassanngaannartumilluunniit kigaallakkaangata allatulluunniit pasinarsinnaasumik iliuuseqaleraangata akuliussinnaavoq. Suliniaqatigiiffiup sinerissami nakkutilliisut qanimut suleqatigai, piffimmilu 3 mio. kvardratkilometerimit annertunerusumi imaani isumannaallisaanerup qaffanneqarneranut ilapittuilluni.

Naalakkersuisoq angalanerup naammassinerani ima oqaaseqarpoq: ”Kalaallit Nunaanni aningaasaliinissaq pilerinarnerulersikkusukkutsigu saqqumilaartariaqarpugut aningaasaliisartullu naapinnerani peqataalluta. Isumasioqatigiinnermi tassanilu oqallinnermi peqataaninni Kalaallit Nunaata nunatut aningaasaliiffissatut aammali nunatut Issittumi aningaasaliinissanut, attaveqaatinut isumannaallisaanerlu pillugit nunarsuarmioqatigiit oqalliseqatigiiffiini suliniaqatigiiffiinilu oqaluuserineqaraangata, pitsaanerusumik nittarsaanneranut peqataaqataasimanissara neriuutigaara. Isummat taakku pitsaasumik taperserneqarnerat, tamatumalu saniatigut Kalaallit Nunaat Issittorlu kiisalu tassani periarfissat annertuumik soqutigineqarnerisa misiginerat nuannaarutigaara.”

Attaveqarfissaq: Naalakkersuisoqarfimmi pisortaq Nikolai S. Christensen, Toqq.: +299 346675, nsch@nanoq.gl