Nunani Avannarlerni Ministerit Siunnersuisoqatigiivini Danmarkip 2020-mi siulittaasuunerani Kalaallit Nunaata peqataanera

Nordiske flag

Kalaallit Nunaata siulittaasuunermi suliniutaa saqqummiunneqarpoq aamma Skotlandimi ministerit suleqatigiit Edinburghimi 3. september 2019-imi ataatsimiinnissaannut akuerineqarpoq.

Nunani Avannarlerni Ministerit Siunnersuisoqatigiivini Danmarkip 2020-mi siulittaasuunerani Kalaallit Nunaat peqataavoq.
Nunani Avannarlerni Sinerissami Inuiaqatigiit Piujuartitsisumik Ineriartornissaat Nunani Avannarlerni Suleqatigiinnermut Naalakkersuisup Vittus Qujaukitsup qitiutissavai.
Nunani Avannarlerni sinerissami inuiaqatigiinni inuuffigisatsinni aalisarnerup ingerlalluartuunissaa piujuartitsinissarlu inuuniarnermut tunngaviupput. Tassa "imaani pisuussutit taakkualu aqunneqarnerannut ilisimasanik tunngavissanik sapinngisamik annertunerpaanik qulakkeerinnissaagut. Taamaattumik aningaasaqarneq eqqarsaatigalugu aalisakkap sapinngisamik pitsaanerpaamik qanoq atorneqarsinnaanera tappiffiginerussavarput aalisakkallu nalingata sapinngisamik annertunerpaartaa Nunani Avannarlerni, matumanilu nunami illoqarfinni nunaqarfinnilu sinerissami inuiaqatigiinnut tuttarnissaat qulakkiissallugu", Nunani Avannarlerni Suleqatigiinnermut Naalakkersuisoq Vittus Qujaukitsoq oqarpoq.

Sinerissami inuiaqatigiit ikittut amerlanertigullu avinngarusimasut innuttaasut agguataarsimanerisigut arlalinnik unammilligassaqarput, tassami innuttaasut utoqqaliartorput inuusuttullu illoqarfinnut nutserlutik. ”Nunani avannarlerni ataqatigiinnerunissaq sinerissamilu inuiaqatigiit aningaasaqarnikkut katataannginnissaat kissaatigigutsigu inuiaqatigiinni taakkunani aningaasaqarnikkut piujuartitsisumik ineriartornissaq qulakkeertariaqarparput”.

Nangeqqillunilu: "inuusuttut imminnut tatiginerulersissavavut, nammineersinnaassuseqarnerulersissavavut inuiaqatigiinnullu tapersiisinnaanerulersissallugit. Inuusuttut imaanut atassuteqartutut misigilersissavagut taamaalillutik imarsiornermik ingerlataqartunut, immamut imaanilu pisuussutinut, tassa suliassaqarfimmut aningaasaqarnitsinnut annertuumik periarfissalimmut soqutiginninnerulerniassammata", Vittus Qujaukitsoq oqarpoq.

Sinerissami inuiaqatigiinni innuttaasut akuttunngitsumik ilaquttanik, kammalaatinik nalunngisanillu imaatigut annaasaqartarput. ”SAR-imik ingerlatsinernik ajornannginnerulersitsisussaq, tassa angallatinut mikinerusunut, sunngiffimmi angalaartartunut umiatsiaararsortunullu digitalimik aaqqiissut, ajornanngitsuaqqamik atorneqarsinnaasoq suliniummi ilaatigut saqqummiutissavarput. Taakkua saniatigut Nunani Avannarlerni meeqqanut inuusuttunullu imaani sillimaniarnermut tunngasunik sukumiisumik ilitsersuussisoqassaaq", Vittus Qujaukitsoq naggasiivoq.

Siulittaasuunermi suliniummi Kalaallit Nunaat pingasunik suliniuteqarpoq:

• Nunani Avannarlerni Sinerissami Inuiaqatigiinni aalisarnermi pisuussutinik piujuartitsisumik atuineq, aamma
• Aalisarneq, naleqalersitsineq piujuartitsisumillu ineriartorneq kiisalu
• Imaani sillimaniarneq.

Siulittaasuunermi suliniutit Pinngortitaleriffimmit, Ilisimatusarfimmit Imarsiornermillu Ilinniarfimmit aqunneqassapput, matumani nunani avannarlerni suleqatit arlallit suleqatiginerisigut tamarmik immikkut suliniummik ingerlataqassallutik.

Nunani Avannarlerni Ministerit Siunnersuisoqatigiiffiat siulittaasuunermi suliniutinut 45 mio. DKK-nik nunamut siulittaasoqarfiusumut ukiuni 3-ni atorneqartussanik immikkoortitsivoq. Danmark naalagaaffeqatigiinni nunat pingasuusut akornanni siulittaasuunermik avitseqateqassaaq, tassani Kalaallit Nunaat, Savalimmiut Danmarkilu immikkut siulittaasup suliassaannik, tamarmik immikkut 15 mio DKK missaannik aningaasaliiffigineqartunik, isumagisaqassapput.

Erseqqinnerusunik paasisaqarusuttut immikkut siunnersorti Nunanut Allanut Naalakkersuisoqarfimmeersoq Upaluk Poppel attaveqarfigisinnaavaat, upap@nanoq.gl