Illersornissaqarfiup Kangerlussuarmik atuinissamik kissaateqarnerannut aaqqiiniarlutik Naalakkersuisut pimoorussillutik suliaqarput

Naalakkersuisut taamatullu Forsvarsministerip isumaqatigiissutigaat, illersornissaqarfiup Kangerlussuup Mittarfianik atuinissaa pillugu isumaqatigiissusiassaq Naalakkersuisut aamma danskit naalakkersuisuisa akornanni ataatsimoortumik aalajangiiffigineqassasoq.

Taamaattorli Namminersorlutik Oqartussat Kangerlussuarmi mittarfimmik piginnittuummata, Kangerlussuup Mittarfiata siunissaa pillugu apeqqut kalaallit kisimik aalajangigassarigaat Naalakkersuisuniit erseqqissaatigineqassaaq.

2019-imi upernaakkulli Naalakkersuisut forsvarsministeriaqarfik suleqatigalugu illersornissaqarfiup Kalaallit Nunaanni Issittumilu silaannakkut angallannermi sullissinerminnut Kangerlussuarmik atuiinnarnissamik kissaateqarneranut, piffiup nalaani forsvarsministeriusimasumit nalunaarutigineqartutut ilusilimmik aaqqiiniarlutik sulipput. Tamatumunnga atatillugu suleqatigiissitamik pilersitsisoqarpoq, tassalu suliaq maanna tunngaviusumik isumaqatigiissusiornermik inerneqartussatut isikkoqarpoq.

Ineqarnermut Attaveqaqatigiinnermullu Naalakkersuisoq Karl Frederik Danielsen aamma Nunanut Allanut Naalakkersuisoq Ane Lone Bagger ataatsimoorlutik imaattumik oqaaseqaateqarput:

”Atorfilittagut piffissami sivitsulersumi suliap ingerlaqqinnissaanut tunngaviusumik isumaqatigiissusiassamut aaqqiissutissamik nassaarniarlutik ulappussimapput. Qanittumi tunngaviusumik isumaqatigiissutip pingaarnerup atsiorneratigut suliami alloriarnerup siulliup naammassinissaanut qilanaarpugut. Kiisalu Kangerlussuup Mittarfia matuneqassanngitsoq Naalakkersuisuniit kissaatigineqarpoq, tamannalu sulinitsinni pingaarutilittut siunnerfigaarput.

Illersornissaqarfiup Kangerlussuup Mittarfianik atuiinnarnissaanut sinaakkutissat inissinneqariarpata, suleqatigiissitap illersornissaqarfimmit kommunimillu ilaasortaaffigineqartup tunngavissai inissittussaapput. Naalakkersuisunit suliap ingerlaqqinnissaa qilanaarineqarpoq.”



Annertunerusumik paasisaqarusunnermi attaveqarfissaq Naalakkersuisoq Ane Lone Bagger-ip allattaa, Rosa Thorsen +299 553303 rosath@nanoq.gl
aamma/imaluunniit
Naalakkersuisoq Karl Frederik Danielsen-ip allattaa, Anders Samuelsen +299 290320 ansa@nanoq.gl