Nunarsuaq tamakkerlugu imminut toquttarneq pitsaaliorniarlugu ulloq malunnartinneqartoq

Ulloq 10. september nunarsuaq tamakkerlugu imminut toquttarneq pitsaaliorniarlugu ulloq malunnartinneqartarpoq. Nunarsuaq tamakkerlugu imminut toquttarnerup pitsaaliorneqarnissaa pillugu suliniuteqartoqartariaqartoq paaseqqullugu aaqqissuisoqarpoq. Nunatsinni sumiiffinni arlalinni ulloq aaqqissuussinikkut malunnartinniarneqarpoq.

- Imminut toquttarneq ajornartorsiutaavoq annertoorujussuaq ilungersunartorlu, inuiaqatigiinnilu amerlasoorparujussuit imminut toquttarnermik eqqugaasarput. Imminut toquttarnermut ajornartorsiutit assigiinngitsut atugaaneri pissutaasarput, kisianni ilisimatusarnermit ilisimavarput, peroriartornermi pissutsit atorsimasat, inuunerup sinnerani imminut toqunnissamut ulorianartorsiornermut aamma imminut toqoriaraluarnermut erseqqilluinnartumik attuumassuteqartartut, oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen, nangillunilu:

- Taamaattumik imminut toquttarneq akiorniarlugu persuttaasarnerup aamma kinguaassiutitigut atornerluinerup aamma imigassamik ikiaroornartumillu atornerluinerup pitsaaliorneqarneri suliniutitta pingaarnersat ilagaat. Inuiaqatigiinni ataatsimoorluta meeqqat pitsaasunik toqqissisimanartunillu peroriartornerminni atugagarnissaat qulakkeertariaqarparput.

Imminut toquttarneq pitsaaliorniarlugu maanna suliniutit ilagaat pilersaarut ThinkInuk. ThinkInuk eqqarsartaaseqarnermut (nammineq iliuuserisartakkat pillugit eqqarsartaatsikkut qanoq issutsit soorlu misigissutsit, eqqarsaatit, kissaatit, pilersaarutillu atorlugit paasinninneq nassuiaanerlu) tunngasunik pikkorissartitsisarpoq, taanna nammineq eqqarsaatigisat pillugit eqqarsarsinnaanermut piginnaaneruvoq, taannalu eqqarsaatit oqimaatsut pinngoraangata qanoq iliuuseqarnissamut sakkussanik tunisisarpoq.

- ThinkInuk imminut toquttarnerup pitsaaliorneqarnerani suliniutaavoq pingaarutilik, taanna suliatigut sullissisunit innuttaasunillu atorneqarsinnaavoq. ThinkInuk-p nukittoqutaasa ilagaat, pisariunngitsunik sunniuteqarluartunillu sakkussanik tamanik atorneqarsinnaasunik tunniussisarnera. Aalajangiunneqarsimavoq ThinkInuk kommuninut tamanut siaruaanneqassasoq, oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen.

Ukioq manna nunarsuaq tamakkerlugu imminut toquttarneq pitsaaliorniarlugu ullormut malunnartinneqartumut atatillugu sumiiffinni aaqqissuussaqarnernut atugassanik tapiissutinik qinnuteqarnissaq aamma periarfissaaqqissimavoq. Sumiiffinni aaqqissuussinernut nuna tamakkerlugu illoqarfinni nunaqarfinnilu 29-ini tapiisoqarsimavoq.


Paasisaqarnerorusuikkuit attavigiuk immikkoortortami pisortaagallartoq Ditte Sølbeck, oqarasuaatikkut +299 34 60 37 imaluunniit e-mailikkut ditt@nanoq.gl