Washingtonimi ilisimatusarnermi sammisaqartitsinermi Ane Lone Bagger pingaarnertut oqalugiartuuvoq

Kalaallit Nunaanni ilisimatusarnermi nunarsuarmioqatigiit suleqatigiinnissaannut Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup kaammattuutigaa.

Ataasinngornermi 9/9-19 Wilson Center, Washington DC-mi Kalaallit Nunaanni ilisimatusarnermi suleqatigiinnissaq pillugu oqallittoqarmat inersuaq soqutiginnittunik inoqarluarpoq.

Ilisimatusartut, aalajangiisartut siunnersortillu ataatsimoorput Kalaallit Nunaanni ilisimatusarneq pillugu suleqatigiissutigiiffiusinnaasut nutaat ilisimatusartut nunatsinneersunit amerikarmiullu oqallisigalugit. Ilisimatusarnermi aaqqissuussineq Wilson Centerimit taamatullu Kalaallit Nunaata Washington DC-mi sinniisoqarfiata suleqatigiillutik ingerlappaat, suleqatigiinnerlu Greenland Dialoguemik taaguuteqarput.

Tassani Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger pingaarnertut oqalugiartuuvoq, tassanilu pingaarnertut oqariartuutigaa ilisimatusartut akunnerminni suleqatigiinnerunissaat, taamaalilluni Kalaallit Nunaata inuiaqatigiinnut iluaqutaassammat.

”Ilisimatusartut amerlasuut nunarput tikeraartarpaat, amerlasuutigulli inuiaqatigiinnut ungasittarlutik. Suliat tamakku inuiaqatigiinnut sunniuteqarnerunissaat kissaatigaarput. Taamaattumillu Kalaallit Nunaanni ilisimatusartut ataatsimoorfissaannik pilersitsinissaq sulissutigaarput, ataatsimoorfissaq ilisimatusartut inuiaqatigiillu naapittarfiattut inissisimassaaq”, taama Ane Lone Bagger oqarpoq.

Greenland Dialogues tassaavoq eqqarsaqatigiittartut The Woodrow Wilson Centerip issittumut soqutiginnittui ”Polar Initiative”-ikkut Kalaallit Nunaata Washington DC-mi sinniisoqarfiatalu suleqatigiinnerannut taaguut, taakkulu Kalaallit Nunaata ersarinnerulernissaanut, ilisimaneqarnerulernissaanut akuunerulernissaanut aaqqissuussisartussaallutik.

Sammisaqartitsineq amerikamiut isiginnaarutaatigut tamanit takuneqarsinnaasutigut C-SPAN-ikkut politikkimik sammisaqartukkut toqqaannartumik aallakaatinneqarpoq.

Ane Lone Baggerip erseqqissarpaa ilisimatusarneq Kalaallit Nunaannut pingaaruteqartuusoq:
”Issittumi Kalaallit Nunaannilu ilisimatusarneq soorunami Kalaallit Nunaannut pingaaruteqarpoq. Taamaattumillu oqaaseqarninni nunarsuarmioqatigiit ilisimatusarnerup iluani suleqatigiissinnaanerata pingaaruteqassusaa, tassuuna ilisimatusarnerup Kalaallit Nunaannut inuiaqatigiinnullu suleqateqarnissaq pingaartillugu oqariartuutigaara. Nunatsinni ilisimatusarneq Kalaallit Nunaannut inuiaqatigiinnullu iluaqutaanissaa pingaaruteqarpoq. Ilisimatusarnermik paasisat siammaassuunneqarnerata kingunerisinnaavaa, inuusuttut ilisimatusarnermut ilinniarusulernerannut kajumilersitsinneqarnerat, ilisimatusarnerullu silarsuaannut malinnaarusulersitsillugit. Ilutigalugu inuiaqatigiit ilisimatusartunut aqqutissiuussinikkut ikiuussinnaapput”, taama Ane Lone Bagger oqarqarpoq.

Aaqqissuussinermut Link uani takuneqarsinnaavoq

Annertunerusumik paasisaqarusukkuit attavigiuk: Naalakkersuisup allattaa Rosa Thorsen, rosath@nanoq.gl +299553303