Qeqertarsuup Tunuani qaleralittassiissutit ilaneqarput

Naalakkersuisut september-ip arfernganni 2019-imi aalajangerpaat Qeqertarsuup Tunuani sinerissap qanittuani qaleralittassiissutigineqartut 2.400 tons-inik ilaneqassasut. Taamaalilluni Qeqertarsuup Tunuani 2019-imi qaleralittassiissuteqarnermut TAC, akuerisaasumik pisarineqarsinnaasut, 10.580 tons-iulissapput. Ilisimatuussutsikkut innersuussutigineqartut Qeqertarsuup Tunuani 5.120 tons-iupput.

Qaleralittassiissutigineqartut aalisariutinik umitsiaaqqanillu aalisartunut agguaasseriaaseq atuuttoq naapertorlugu pisassiissutigineqassapput, aalisariutinik aalisartunut 53,3 procent-it pisassiissutaassallutik 46,7 procent-it umiatsiaaqqanik aalisartunut pisassiissutaasut. Aalisarnermut akuersissutit pisassiissutillu pillugit Namminersorlutik Oqartussat nalunaarutaat nr. 8, 8. april 2016-imeersoq § 7 immikkoortoq 2 naapertorlugu aalisariutinik aalisartunut ilassutigineqartut ukiup tulliani pisassiissutigineqartunut nuunneqarsinnaanngillat.

Qeqertarsuup Tunuani qalerallit umiatsiaaqqanik aalisartunut aalisarneqartartut nalunaarsorneqarnerisa takutippaat, ukioq manna pisassiissutigineqartut sapaatip akunnerani matumani tamakkerlugit aalisarneqalersimassasut. Ilassutigineqartut 1.373 tons-it Qeqertarsuup Tunuani umiatsiaaqqanik aalisartunut ukiup sinneranut pisassiissutaapput, taakku qaammatinut tulliuttunut agguarlugit pisassiissutigineqassallutik. Naatsorsuutigineqarpoq ilassutigineqartut ukiup naanissaanut aalisartitsiumaartut.

Aqutsiveqarfimmi aalisarneq tamavimmi unitsinneqartassaaq qaammammut pisassiissutigineqartut tamakkerlugit aalisarneqaraangata, tamannalu atuutissaaq 2019-p naanissaata tungaanut.

Naalakkersuisut maannakkut sulissutigaat aqutsiverqarfik 47-mi killeqanngitsumik pisassiissutigineqartut atorunnaarsinneqarnissaasa nalilersuiffiginissaat aammalu Qeqertarsuup Tunuani aalisarsinnaanermut akuersissutinik tunniussisarnerup unitsinneqarnissaa.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl

Sukumiinerusumik paasisaqarusukkaanni Naalakkersuisoqarfimmi pisortaaneq Jørgen Isak Olsen Aalisarnermut Piniarnermut Nunalerinermullu Naalakkersuisoqarfimmut attagivigneqarsinnaavoq. E-mail: jio@nanoq.gl