Upernavimmi akisussaaqataaneq ukkatarineqarpoq

Sisamanngorneq ulloq 5. september Peqqissutsimut Isumaginninnermullu Naalakkersuisoq Martha Abelsen Utoqqaat illuat aamma atuartut angerlarsimaffiat pulaarpai. Taakku saniatigut Upernavimmi najukkami ataatsimiititaliaq aamma pinaveersaartitsinermut ataatsimiititaliaq ataatsimeeqatigai.

Pisortaqarfinni atorfinitsitsiniarnermi unammillernartut annertuut ataatsimiinnermi qulequtareqqinneqarput. Utoqqaat illuani atorfiit aalajangersimasut affaat missaat kisimi inuttaqarput. Tamanna utoqqarnik paaqqinninnermut pisariaqartumut sunniuteqarpoq, amerlanerit annertuumik paaqqutarinninnissamut pisariaqarititsisuupput. Utoqqaat illuanni najugallit amerlanerpaartaat nunaqarfimminngaanneersuupput.

Atuartut najugarisaat meeqqanut nunaqarfimminngaanneersunut angerlarsimaffiuvoq, aappariinnut atuartunullu 30-nut 8 klassemiit 10. Klasse ilanngullugu najugaqarfigineqarsinnaasoq. Tallimanik sulisoqarpoq, taamaasillunilu ulloq unnuarlu inersimasoqartarluni. Atuarfimmi aamma atuartut inaani sulisut “Fair start”-imi ilinniakkami peqataanikuupput, taamaasillutik kinguaassiutitigut kanngutsaattuliornerit pillugit ajornartorsiutit isumaginissaanut sakkussaqalerlutik.

Peqqinnissaqarfiup aamma ilaqutariinnut sullissiviup akornanni siusinaartumik iliuuseqarnermik aamma MANU-mik angajoqqaanngornissamik piareersaanermik suleqatigiinneq aallaqqaammut arriitsumik ingerlavoq erninermi sulinngiffeqarneq atorfinitsitsiniarnerlu pissutaallutik, kisianni tamanna aallartisarneqarpoq maannakkullu sundhedsassistentit marluk MANU pillugu ilitsersorneqarlutik.


Ataatsimiititaliani marluusuni imigassamik atuisarnerup ajornartorsiutit aamma sapaatip akunnerata naanerani aalakoorpallaarnermiit atueriaatsip peqqinnarnerusumik allanngornissaanut pisariaqartitsisoqarneranik eqqartorneqarpoq. Sunngiffimmi sammisassat peqqinnartut ataatsimiititaliani marluusuni suliassatut eqqaaneqarput.

”Ataatsimiitaliani marluusuni piumassuseqartoqarluartoqarneranik aamma sammisassat peqqinnartut suliarineqarusussuseqarnerannik maluginiarpara, taamaasillungalu kajumissaarpakka inuusuttut akisussaaqataanermik qanoq ilanngunneqarsinnaanerannik misissuisoqarnissaanut. Assersuutigalugu utoqqaat illuanni kajumissutsimik ikiuisoqarsinnaavoq, immaqa utoqqaat pisuttuaqatigalugit il. Il..”



Martha Abelsen kingusinnerusukkut Upernavimmut tikeraaqqinnissani kissaatigalugu aamma nunaqarfiit maannakkut tikinneqanngitsut tikeraarumaallugit ataatsimiititaliamut oqarpoq.

"Sulisoqarniarnermut unamminartut inuiaqatigiit suliffeqarfiutaani ajornartorsiutaapput nalinginnaasut aamma tamanna pillugu Naalakkersuisuni suleqatinnut siunnersuutiginiarpara ataatsimoortumik immikkuutaartumiinngitsoq inuiaqatigiit pillugit misissuisoqarnissaanut"
Martha Abelsen naggasiivoq.

Paasisaqarnerorusukkuit naalakkersuisup allattaa Inger Heilmann Larsen oqarasuut +299 55 41 60 imaluunniit e-mail ihla@nanoq.gl attavigisinnaavat.