Mittarfeqarfinni akitsuutinik nutaamik ilusiliineq

Allattoq Naalakkersuisoq Karl Frederik Danielsen

Mittarfeqarfinni akitsuutinik nutaamik ilusiliinissaq Naalakkersuisut ukioq manna siusinnerusukkut akueraat.

Maannakkut mittarfinni akigititat atuunneranni Mittarfeqarfiit amigartooruteqartarput. Tamanna isumaqarpoq mittarfinnut akigititat ingerlatseqatigiiffimmi ingerlatsinermut aningaasartuutinut matussusiisinnaanngitsut. Mittarfinnik ingerlatsinermi atuisunut akikippallaamik tunisisoqartarsimavoq, tamatumalu sivisuumik attatiinnarnissaa illersorneqarsinnaanngilaq. Mittarfeqarfiit oqartussat piumasarisaattut isumannaallisaanerup pitsaassusaa attatiinnarsinnaassappagu, sanaartukkanut atortunullu ingerlaavartumik aningaasaleeqqittarnissaq pisariaqarpoq.

Mittarfeqarfiit mittarfiini aningaasaleeqqittoqarneq ajorpat, Trafikstyrelsip qulimiguulinnut mittarfinnik imaluunniit mittarfinnik matusisinnaanera aarlerinaateqarpoq. Tamanna aamma 2020-imut Aningaasanut inatsisissatut siunnersuummi ersarissumik allassimavoq.

Taamaattumik Naalakkersuisut akitsuutit nutaamik ilusiligaanerannut suliap ingerlanissaa aallartippaat, tassani isertitat aamma aningaasartuutit imminnut ataqatigiissinneqarnerulerlutik.

Taamaalillutik Naalakkersuisut eqqummaarissumik iliuuseqarput, nunatsinni mittarfinni attaveqaqatigiinnerup ingerlanerata qulakkeernissaa siunertaralugu.

Tamatuma saniatigut Mittarfeqarfiit akigititaat 2013-imiilli akinut nalimmassarneqarsimanngillat.

Akinut nalimmassaasimannginneq taanna, sunniuteqarluarnerulersitsiniarnerit ingerlanneqarsimagaluartut, piffissami 2013-imiit 2018-imut Mittarfeqarfiit ingerlatsineranni 25 mio. koruunit missaanni neriuisimavoq, taamaattumik maannakkut iluarsineqarnissaa pisariaqarluinnalersimalluni.

Mittarfeqarfiit ingerlatseqatigiiffimmut annertunerusunik aningaasaliiffigineqarnissaq nukinginnartumik pisariaqartippaa. Tamanna akigititat qaffannerisigut imaluunniit aningaasanut inatsisip suliarineqarneranut atatillugu pingaarnersiuinikkut, taamaallaat pisinnaavoq – naatsumik oqaatigalugu, akileraartartut tamarmik aningaasaleeqqinnernut akiliissanersut imaluunniit atuisartut akiliissanersut, toqqaasoqartussaavoq.

Atuisut qulimiguulinnut mittarfinnik aamma mittarfinnik atuinerminnut akiliisassasut, Naalakkersuisut akigititat nutaamik ilusiligaaneranni aalajangiuppaat. Nutaanik suliniuteqarnerit aningaasalersorneqarnerat nammineq sinaakkutissat iluanni pisussaavoq. Assersuutigalugu umiarsualivinnut suliassaqarfimmit imaluunniit inissianik iluarsaassinissamit aningaasassanik aallertoqassasoq, Naalakkersuisut isumaqanngillat.

Akigititat allanngortinneqarnerat nuannarineqarneq ajorpoq, kisianni attaveqaqatigiinnerup aserfallakkiartunnginnissaanut aningaasaleeqqittarnissaq pisariaqarluinnarpoq.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Anders Samuelsen uani ansa@nanoq.gl.