Nujuartat neqaanni parasitteqarneranik paasissutissiineq

Ukioq manna aamma tuttuni pisarineqartuni parasittinik (uumasuaqqanik miluuffigisaminit inuussutilinnik) nassaartoqarsimavoq. Paamiut-niit Kangerlussuaq-miillu piniartuniik nalunaarutigineqarpoq qumaarsussuup qullugiaanik arlalinnik tuttut neqaanni nassaartoqarsimasoq, taamaammat nunatta kitaata sineriaani allami nassaarineqarsinnaasut ilimanarpoq.

Tamanna Kalaallit Nunaanni Uumasut Nakorsaqarfik Inuussutissalerinermullu Oqartussaniit (UNIO) nujuartat neqaanni uumasuaqqanik miluuffigisaminit inuussutilinnik assigiinngitsunik tunillatsittoqarsinnaaneranik kiisalu napparsimalinnginnissamut sillimanissaq suut malinneqartariaqarnersut pillugit ilisimatitsissuteqarput.

Trikinose: Trikinose nappaataavoq ulorianartoq uumasuniit inunnut tunillaassinnaasoq. Nappaammut pissutaapput rundormelarver trikinenik taaneqartartut, pingaartumik nersutini qaasuttuniittartut soorlu assersuutigalugu nannuni, aaverni, puisini, qimmini qimuttuni, amaqquni teriannissanilu. Trikinosemik tunillatsittoqarsinnaavoq uumasut siuliini taaneqartut neqaannik aapasunik nerigaanni. Neqimik qerititsineq trikininik tunillaajunnaarsitsisanngilaq. Neqimi trikinit qullugiaannik peqarnersoq isaannarmik takuneqarsinnaanngilaq. Trikinoserneq inummiit inummut tuniluunneq ajorpoq.

Kalaallit Nunaanni inuit trikinoseqartut arlaleriarluni paasineqartarpoq. Trikinosernermut malunniutaasinnaapput inalukkatigut ajornartorsiuteqarneq, kissarulunneq, inuunilunneq nukitsigullu anniarisaqarneq. Isit sinaanni pullattoqarnera takuneqarsinnaakkajuttarpoq. Sakkortuumik tunillatsissimagaanni nukiit taamatuttaaq uummat ilungersunartumik ajoquserneqarsinnaapput.


Trikinip qullugiaa poorsimasoq nannup neqaani. Allisitsiuserluni assiliisoqarsimavoq. Assiliisoq: UNIO / DTU

Sarcocyster: Sarcocyster titarnertut qaqortutut amitsutut takussaasarput neqimi qaqorteqqasunut (suaasanut qaqortunut) assingullutik. Sarcocyster Kalaallit Nunaata tuttuini takuneqarsimapput. Sarcocyster Kalaallit Nunaanni inunnut tunillaassimanersoq malussartoqarsimanngilaq. Nunani eqqiluisaarnikkut atortuluttuni sarcosysterinik tunillatsittoqarsinnaavoq, puulukit nersussuillu neqaannik qalanneqarluanngitsunik nerisimagaanni. Timminneq, kissarulunneq, meriarneq, nukitsigut nukillaanganeq nukitsigullu annerisaqarneq tunillatsinnermut takussutaasinnaapput.


Sarcocyster tuttup neqaani. Assiliisoq: Pinngortitaleriffik

Qumaarsussuaq: neqimi pullarinertut mikisutut, qaqortutut ammalortutullu takuneqarsinnaasarput. Ammalortut qaqortut taakku qumaarsussuup qullugiarai puulinngortut, Taenia krabbei, neqimi toquusarsimasut. Qumaarsussuaq inersimasoq nersutit qaasuttut soorlu assersuutigalugu teriannissat, qimmit amaqqullu inalugaanniittarpoq qullugiaalu tuttut umimmaallu neqaaniissinnaallutik. Taenia krabbei-inik Kalaallit Nunaanni inunnut tunillaattoqarneranik malussartoqarsimanngilaq. Inuit qumaarsussuaqalikkajunnerusarput puulukip neqaanik, aalisakkanit taserneersunit imaluunniit nersussuit neqaannik nunanit eqqiluisaarnikkut atortuluttuneersunik qalallugit sianneqarsimanngitsunik nerigaangamik. Qumaarsussuit amerlasuut napparsimalissutaasanngillat ilaalli naarlulersitsisinnaapput, merianngulersitsillutik neriumarpiarunnaarsitsillutik akuttusuunillu sianiutilunnermillu malunniutsitsisinnaallutik.


Qumaarsussuup qullugiaa tuttup neqaani. Assiliisoq: Pinngortitaleriffik

Tuttup kumai: Tuttup kumaa inersimasoq augustusip qaammataani tuttut amianni quperluliortarpoq. Taamaalereerpat quperloq tuttup amia putullugu pulasarpoq tassanilu ukiisarluni. Maj/junimi quperlup tuttu qimattarpaa nunamilu puulinngortarluni inersimasunngornissami tungaanut kinguaariiaarnerlu aallaqqaataaniit allarteqqittarlugu. Tuttup kumaa tuttunik puullaaqilersitsisarpoq sanigortitsisinnaallunilu, soorluttaaq tuttup amianut ajoqusiisinnaalluni. Inuit tuttup kumaasa quperluinik nerinermikkut tunillanneqarsinnaanngillat. Taamaakkaluartoq inuit tunillatsissinnaanerannik allaaserinnittoqarsimavoq tuttup kumai inersimasut inuit nujaannut qarluinullu quperluliortarsimasut.



Tuttup kumaasa quperlui tuttumi. Assiliisoq: F Ugarte.

Tuttup iggiaata kumaa: Qaammatini juli-aggustimi tuttup iggiaata kumaata inersimasup quperlut uumasut tuttut sorluinut tissalukaartittarpai. Quperlut taamaalereerpat anersaartornermut aqqutaasigut ilorpartertarput toqqusaavisalu iluanni nipputtarlutik, tassani ukiisarlutik. Maj/junimi quperlut anillaqqittarput imaluunniit tuttunit suppussaasarlutik. Taamaalereerpat quperlut nunami inersimasunngornissamik tungaanut puulinngortarput kinguaariinnerlu aallaqqaataaniit aallartittarlugu. Tuttup iggiaata kumaa tuttunik puullaaqilersitsisarpoq sanigortitsisinnaallunilu. Inuit tuttup kumaasa quperluinik nerinermikkut tunillanneqarsinnaanngillat.


Iggissap kumaasa quperlui tuttup iggiaani. Assiliisoq: C Cuyler / Pinngortitaleriffik

Ima ilioruit napparsimalissanngilatit;
Mianersornissamik tunngaveqarneq aallaavigalugu kaammattuutigineqassaaq nujuartat neqaat 75° Celsiusinut iluunngarlugit kissanneqartassasut. Taamatut uunartumiititsineq uumasuaqqanut miluuffigisaminut inuussutilinnut toqoraataassaaq. Neqi naammattumik qalaassaq siatarluunniit qasertumik kajorpasissumilluunniit qalipaateqalersarpoq.

Neqimik qerititsineq, pujoorineq nikkulinerluunniit trikininut, qumaarsussuarnut sarcocysterinulluunniit toqoraataanngillat.

Uumasut nujuartat neqaat qalanneqarluarsimanngitsut nunaannarmut qimanneqartassanngillat qimminulluunniit nerukkaatigineqartassanatik. Taakku tamarmik uumasuarsunnik ingerlatitseqqeqataasinnaapput tassami kinguaassiornerminni uumasut qaasuttut (soorlu teriannissat qimmillu) silutuumasullu pisariaqartikkamikkit. Illittaaq qimmitit malussarniarfigisassavatit - ilittulli - neqimik tunillannartulimmik nerinermikkut napparsimalersinnaammata.

Neqinik uumasuarsunnik tunillanneqarsimasunik qimatsisariaqalissaguit kaammattuutigineqassaaq ikuallassagitit, minnerpaamik 1 meteritut ititigisumut nunami matuussagitit imaluunniit imaanut kivisissagitit.

Nalorniguit UNIO-mit kaammattuutigaarput neqi nerissanngikkit.

Apeqqutissat uunga ingerlatinneqassapput:
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik
Aqqusinersuaq 31 2 tv
3900 Nuuk
E-mail: uumasut@nanoq gl
Oqarasuaatip nr.: 34 50 00