Upernaviup nunaqarfiini peqqinnissaq pillugu oqaloqatigiinnerit

Pingasunngorneq ulloq 4. september Naalakkersuisup Martha Abelsenip Upernaviup pigisaani nunaqarfinni aqutsisut ataatsimeeqatigai aamma nunaqarfinni Tasiusami, Innaarsunni, Naajaani Aappilattumilu nakorsiartitsiviit alakkarlugit.

Peqqinnissaqarfiit ataatsimut isigissagaanni nunaqarfinni peqqissutsikkut sullissisunik sulisussarsiorneq ajornartorsiutaavoq. Sumiiffinni arlalinni inissaaleqineq aalisakkerinermillu suliaqarnissap orniginartinneqarnerunera sulisussarsiornikkut unammillerneqarnermut pissutaanerarneqarpoq.

”Nuannaarutigivara nunaqarfinni aqutsisut peqqinnissaqarfimmi sulilernissamik inuusuttunik kajumissaarinissamik akisussaaffik tigusimammassuk, peqqissutsikkullu sullissinerup pissutsini atugarineqartuni qanoq pitsaanerpaasinnaanera ataatsimoorluta ujartortariaqarparput. Avataaneersut immaqa piffissami sivikinnerusumi tikillutik sullissinissaat utaqqiinnarsinnaanngilarput – nunaqavissut akisussaaffimmik tiguseqataasariaqarput,”  taama Martha Abelsen oqarpoq.

Attaveqarnermut aaqqissuussaaneq napparsimasut peqqissutsikkut sullinneqarnermik misigisaannut pingaaruteqarluinnarpoq. Qarasaasiakkut nakorsiartitsisarneq nunaqarfimmiut peqqissutsikkut sullissisunut ilinniarsimasunut attaveqartarnerannut sakkuummat tunngaviulluinnartoq pingaaruteqartorlu internetikkut attaveqaatit pingaaruteqarneruleraluttuinnarput.

”Ukiup ingerlanerani nunaqarfinni tikeraakkanni tamani suliffeqarfiit inuiaqatigiinnut pingaaruteqarluinnartut pisortaat suleqatigeeqqullugit kajumissaartarpakka. Nunaqarfinni inuuneq nuannersoq peqqissorlu pillugit suleqatigiiffiusinnaasut amerlapput. Taamaalillunga nunaqarfinni aqutsisut peqqissumik inuuneqarnissap sulissutigineqarnerani maligassiuinissap nunaqarfinnilu suliffeqarfinnik inuiaqatigiinnut pingaaruteqartunik allanik suleqatissarsiornissap pisariaqarluinnarneranik kajumissaarlugillu eqqaasippakka” Martha Abelsen naggasiivoq.

Martha Abelsenip angalanini ulloq 5. september susassaqarfiit akimut suleqatigiinnerat pillugu Upernavimmi politikerinik atorfilittanillu arlaleriarluni ataatsimeeqateqarnernik naggasissavaa.

Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut.: +299 55 41 60 imaluunniit e-mailikkut: ihla@nanoq.gl.