Kinguaassiuutitigut atornerluisoqartillugu suliani iliuuseqarneq ukkatarineqarpoq

Kannguttaatsuliortunik katsorsaanerup qanoq ililluni patajaallisarneqarsinnaanera Naalakkersuisup Martha Abelsenip Danmarkimi Islandimilu angalanermini ukkataraa kiisalu kinguaassiuutitigut atornerluisarnerit akiornialugit nunat avannarliit qanoq ilillutik imminnut tapersersoqatigiissinnaanersut nunani avannarlerni suleqatinilu oqaloqatigiissutigisimallugit.

Kinguaassiuutitigut atornerluisoqarsimatillugu suliani erngerluni iliuuseqartoqartassaaq. Eqqugaasut ilumoorunneqarlutik misigissavaat, iliuuseqapallattoqassaaq aamma ikiuinerit pisariaqartut ilanngunneqassallutik.

Kinguaassiuutitigut atornerluisarnerit ikilisinneqassappata, kannguttaatsuliortartunut katsorsarneqarnissamik neqeroorutigineqartartut suunersut isiginiassallugit aammattaaq pisariaqarpoq.

Taamaammat Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsenip Københavnimi Sexologisk Klinik pulaarsimavaa, tassani kinguaassiuutitigut atornerluinermik pinerluuteqarsimasut parnaarussaaqqanerminni imaluunniit katsorsarneqarnissamik piumasaqaatitalimmik eqqartuunneqarsimanerminnut atatillugu Danmarkimit sunik neqeroorfigineqartarnersut paasisaqarfigai.

Pulaareernerup kingorna Isumaginninnermut Naalakkersuisoq Martha Abelsen ima oqaaseqarpoq: “Danmarkip kinguaassiuutitigut atornerluinermik pinerluuteqarsimallutik eqqartuunneqarsimasunut neqeroorutit neqeroorutigisartagai qanoq ilillutik Kalaallit Nunaanni kinguaassiuutitigut atornerluisimanermik pinerluuteqarsimasunut aamma periarfissanngorsinnaanersut soqutigisorujussuuara misissussallugu. Kannguttaatsuliortut “toqqortarineqaannannginnissaat” uannut pingaaruteqartorujussuuvoq. Kannguttaatsuliortut suliapilutik pillugit oqaluuserinninnissamik periarfissaqalerunik taamaaliornermikkullu suut eqqortuunersut eqqunngitsuunersullu paasilerunikkit, taava innarliinerit nutaat pitsaaliorneqarnissaat periarfissinneqarsinnaavoq. Sivisuumik parnaarussaaqqanerup inuup pitsaanerulerneranik kinguneqartarnera misissuinernit uppernarsarneqanngilaq. Akerlianilli kannguttaatsuliortut innuttaasunut ilaalerseqqinniarlugit katsorsarneqanngippata taava nutaamik innarleeqqinnissaat ilimanaatilerujussuusarpoq.”

Tassani pulaareernerup kingorna Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen nunat avannarliit inatsisinik atuutsitsinermut ministeriinik Reykjavikkimi ataatsimeeqateqariartorpoq. Nunani avannarlerni kinguaassiuutitigut atornerluisarnerit pitsaaliorneqarnissaat pillugu suliat 2018-imi aallartinneqartut qanoq ilillutik ingerlateqqinneqarnissaat oqaluuserisassani pingaarnersaasut ilagivaat. Nunani avannarlerni ukiuni tulliuttuni internetti aqqutigalugu kinguaassiuutitigut atornerluisarnerup pitsaaliorneqarnissaata ukkatarinneqarnissaata suleqatigiissutigineqarnissaa oqallisereernermi aalajangiunneqarpoq.

Reykjavikkimi ataatsimeereernerup kingorna Naalakkersuisoq Martha Abelsen ima oqaaseqarpoq: “Internetti aqqutigalugu kinguaassiuutitigut atornerluisoqartarnera pillugu nunani avannarlerni ataatsimoorussamik suliniuteqarnissaq pillugu oqallinnerput assut nuannaarutigaara. Oqallinnitsinni aamma uannut erseqqissivoq kinguaassiuutitigut atornerluinerup pitsaaliorneqarneranut suliniutit pineqartillugit, taava uagut Kalaallit Nunaanni suliniutit eqqarsaatigalugit angusaqarluarsimavugut. Taamaattoq killeqarfiit qaangerlugit pinerluuteqartarnerit pineqartillugit assersuutigalugu nunani avannarlerni suliniutit pisariaqartinneqarmata, soorluttaaq kannguttaatsuliorsimasunut suliniutinik, soorlu Københavnimi Sexologisk Klinikkimi takusattut ittunik pisariaqartitsigatta avaqqunneqarsinnaanngilaq.

Attaveqarfissaq
Paasisaqarnerorusukkuit ministerip allattaa Inger Heilmann Larsen ugguuna ihla@nanoq.gl-ikkut imaluunniit tlf. + 299 554160 atorlugu attavigiuk