Tanbreez Mining A/S-imut IBA-mut isumaqatiginninniarnerit aallarteqqinneqarnerat

Killavaat Alannguanni suliassamut suleqatigiinnissamut isumaqatigiissut (Impact Benefit Agreement - IBA) pillugu isumaqatiginninniarnerit aallarteqqinneqassasut, Aatsitassanut Suliffeqarnermullu Naalakkersuisup kiisalu Tanbreez Mining A/S-imit aammalu Kommune Kujallermit aallartitat akornanni ulloq 19. august ataatsimeeqatigiinnermi isumaqatigiissutigineqarpoq. Ilaatigut suliassap inuiaqatigiinni piujuartussamik iluaqutaasumik sunniuteqarnissaanut nassuiaammut (VSB-mut nassuiaat) missingiut nutartigaq kingulleq Tanbreez-ip nassiummagu, tamatuma kingunerisaanik isumaqatiginninniarnerit aallarteqqinneqarput.

Naalakkersuisoqarfinnut attuumassuteqartunut aamma Kommune Kujallermut tusarniaanerit tunngavigalugit IBA-mut missingiut kingulleq nutarterneqarpoq. Kommuni ukioq manna siusinnerusukkut Tanbreez-imut suleqatigiinnermi siunniussat pillugit isumaqatigiissuteqarsimasoq, Kommune Kujalliup ilaatigut missingiummut oqaaseqaammini eqqumaffigeqquaa.

Aatsitassanut Suliffeqarnermullu Naalakkersuisoq, Erik Jensen, ataatsimiinnernut nangissutigalugu oqarpoq:

”Kalaallit Nunaanni suliffissat aamma Killavaat Alannguanni Tanbreez-ip suliassaanut atatillugu Kujataani suliffeqarfinnut isumaqatigiissutissat qulakkeerneqarnissaat pillugu isumaqatigiissutip isumaqatiginninniutigineqarnera aallarteqqinneqarmat nuannaarutigisorujussuuara. Suliami akuusut tamarmik Tanbreez-ip aamma Kommune Kujalliup akornanni suleqatigiinneq aallaavigalugu ukioq manna imaluunniit ukiup tulliata aallartinnerani pimoorussillutik angusaqarniarsarissasut, aammalu Kommune Kujallermi innuttaasunut iluaqutaasumik siuariartortitsisinnaassasoq aammalu suliffissanik pilersitsiviusinnaassasoq, qularutiginngilara.

Tamatumap aamma takutippaa, siusinnerusukkut allaffissornikkut suliassaqarfiit arlallit maannakkut ataatsimoortinneqarmata, ”one-door”-imut, tunngaviusumi suliat ingerlaneri eqaannerulersinneqarlutillu sukkanerulersinneqarsinnaasut.”
Naalakkersuisoq Erik Jensen oqarpoq.

Greg Barnes Tanbreez-imeersoq isumaqatiginninniarnerit aallarteqqinneqarnerannut nangissutigalugu oqarpoq:
”Tanbreez-ip suliassaata ingerlallualersinnissaanut Aatsitassanut Suliffeqarnermullu Naalakkersuisup, Erik Jensen-ip, aammalu Kommune Kujallermut borgmesterip malunnaatilimmik ikiuussimanerat Tanbreez-ip qujamasuutigaa. Taamatut ikiuuttoqarsimanngippat maannakkut USA-p aamma Kina-p akornanni niuernermi akerleriinnerup, Tanbreez-ip suliassaanut annertoorujussuarnik periarfissaqalersitsisup, iluaqutiginissaa periarfissaqassanngikkaluartoq Tanbreez-ip nassuerutigaa."

Tanbreez-ip piiaanissamut akuersissummik qinnuteqaataata suliarineqarnera pitsaasumik oqaloqatigiilluni aammalu ingerlalluartumik, ingerlaqqippoq, tassani matuma siulianiittut saniatigut aamma peqarfimmik niuernermik tunngaveqartumik piiarneqarsinnaasumik paasinarsisitsisimanissaq killissalersuisimanissarlu pillugit Aatsitassanut ikummatissanullu inatsit malillugu nalilersuisoqarluni. Aammattaaq Kalaallit Nunaanni suliareqqiinerup qanoq annertutiginissaa pillugu nalilersuinerit Aatsitassanut oqartussaqarfiup aallarteqqippai.


Paasissutissanik annertunerusunik piniarnermi attaveqarfigineqassaaq
Jørgen T. Hammeken-Holm, Naalakkersuisoqarfimmi pisortaaneq
Aatsitassanut Suliffeqarnermullu Naalakkersuisoqarfik
Oqarasuaat: (+299) 34 68 46
E-mail: joeh@nanoq.gl