Naligiissitaaneq aamma peqqinnissaq pillugu ataatsimiinnerit pissarsiaqarluarnartut

Peqqissutsimut, Isumaginninnermut Inatsisinullu Atuutsitsinermutt Naalakkersuisoq, Martha Abelsen, politikkikkut aamma naligiissitaaneq pillugu akisussaasoq, pingasunngornermi ulloq 28. august 2019 naligiissitaanermut ministeri Mogens Jensen siullermeerluni ataatsimeeqatigaa.

Ministerit taakku marluk nunat avannarliit naligiissitaaneq pillugu ataatsimut siuttuuffigisassaat suleqatigiiffigisassaallu eqqartorpaat. Aasaqqippat nunat avannarliit Nuummi qanigisanik persuttaasarneq pillugu ataatsimeersuassapput, ataatsimeersuarnermilu oqaluuserisinnaasat ministerit taakku marluk oqaluuseraat. Persuttaasartunik katsorsaaneq aamma inooqatigisamik ilaquttamillu katsorsartinnermi peqateqartitsinermik pisariaqartitsineq aamma qulequttat ilagaat.

Naligiissitaaneq pillugu oqaloqatiginninneq siammasippoq, tassani ministerit marluk naligiissitaaneq pillugu apeqqutit inuusuttunik peqateqartitsineq eqqartorpaat aamma naligiissitaaneq pillugu oqariartuuteqartoqartillugu maligassiuisunik peqateqartitsisarneq eqqartorpaat, kinguaassiutitigut atornerluinermik pitsaaliuineq, arnaqatigiit anguteqatigiinnillu akaarinninneq allallu oqaloqatigiissutigaat.
Suiaassutsip akornanni peqqinnissakkut naligiinnginneq annikitsumik aamma eqqartorneqarpoq. Angutit arnanut sanilliullugit peqqinnissartik pingaartinnginneruaat.

Ualikkut Martha Abelsen Sundhedsminister Magnus Heunicke naapippaa. Ministerit taakku marluk ilaatigut kalaallit nunaanni peqqinnissaqarfimmi atorfinitsitsiniarnermi unamminartut oqilisarnissaannut politikkikkut allaffissornikkullu suleqatigiinnerunissaq eqqartorpaat. Taassuma saniatigut qallunaat nalunaarusiaat marluk kalaallinut innuttaasunut sunniuteqartussaq, ilaatigut kalaallit Danmarkimi angerlarsimaffeqanngitsut aamma kalaallit piffissami aalajangersimasumi Danmarkimiittut peqqinnissakkut sullinneqarnerat pillugu, kiisalu nunat akornanni marluusuni toqusup timaa zinkimik illerfimmik assartorneranut taarsiullugu puumik assartuisalernissaq pillugu peqqussutip killiffia Martha Abelsen apeqquteqaatigai.

Martha Abelsen aamma Kræftens Bekæmpelse pulaarpaa, tassanilu eqqartorneqarpoq kalaallit peqqissartut illuani uninngasut qanoq annerusumik Neriuffik peqatigalugu ikorfartorneqarnissaat siunnersorneqarnissaallu suleqatigiittoqarsinnaanersoq.

”Danskit ministerii Kræftens Bekæmpelselu ataatsimeeqatiginerat iluaqutaaqaat. Ataatsimiinnerni tamani annertuumik soqutigisaqartoqarnera unamminartoqarnitsinnut suleqataarusussuseqartoqarneranut piumassuseqartoqartoq takuara. Peqqinnissakkut aamma naligiissitaanermut tunngatillugu suli annermik suleqateqarnissara qilanaaraara”

Paasisaqarnerujumallutit attavigiuk naalakkersuisoqarfimmi pisortaq Tine Pars oqarasuaatikkut.: +299 55 75 57 imaluunniit e-mailikkut: tine@nanoq.gl