Issittumi imaatigut angallanneq pillugu ataatsimiinneq pingaaruteqartoq

IMO-mi (International Maritime Organization) generalsekretæri Kitack Lim, aggustip 26-anit 28-at ilanngullugu Ilulissanut tikeraarpoq. Danske Rederier kiisalu Søfartsstyrelsi suleqatigalugit, tikeraarnera Namminersorlutik Oqartussanit aaqqissuunneqarpoq. Ineqarnermut Attaveqaqatigiinnermullu Naalakkersuisoq Karl Frederik Danielsen, aaqqissuussinermut qaaqqusisuuvoq.

Karl Frederik Danielsenip oqaatigaa:
”Kalaallit Nunaanni attaveqaqatigiinnermi imarsiorneq toqqammaviuvoq pingaarutilik, taamaattumillu imaatigut isumannaallisaaneq, issittumilu imaani avatangiisit illersorneqarnissaat pineqartillugit, IMO suleqataavoq pingaarutilik. Taamaattumik nuannaarutigaara Generalsekretæri Kitack Lim-i tikilluaqqusinnaagakku, aammalu Kalaallit Nunaata imartaa takutissinnaallugu tassanimi IMO-p polarkodia pingaaruteqarluinnarmat”.


Issittup imartaani oqimaaqatigiissumik, atuilluartumillu ingerlatsinissaq pisariaqartoq, Kitack Lim-ip aallarniutaasumik oqaaseqarnermini erseqqissaatigaa. Ilanngullugu oqaatigaa, imaatigut attaveqaqatigiinneq ineriartortinneqassasoq, issittullu imartaani umiarsuit unammillernartittagaat eqqarsaatigalugit annertunerusumik suleqatigiinnissaq pisariaqartoq.

Imaatigut isumannaallisaaneq kiisalu issittup imartaani isumannaatsumik sumiissusersiorneq ataatsimiinnermi eqqartorneqarput. Imarsiorneq pillugu inatsisip suliarineqarnera, atuutsilersinneqarneralu Søfartsstyrelsip IMO-llu saqqummiuppaat. Sikunik alapernaarsuinermi kiisalu Kalaallit Nunaata imartaata assinganik suliaqarnermi killiffik takorluukkallu, DMI-p aamma Geodatastyrelsip ilaatigut saqqummiupaat.

Tamatuma saniatigut SAR (search and rescue) pillugu unammillernartut, oqartussallu akornanni ulluinnarni qanimut pitsaasumillu suleqatigiinnermi misilittakkat, Issittumi Sakkutooqarfiup kiisalu Kalaallit Nunaanni Politiit saqqummiuppaat.

Pinngortitamut, Avatangiisinullu Naalakkersuisoqarfik aamma Miljø- og Fødevareministeria kiisalu Søfartsstyrelsi oqallissaarisoralugit, issittup imartaata illersorneqarnissaa inaarutaasumik oqallisigineqarpoq.

Ataatsimiinnerup ingerlanerani Royal Arctic Line-mit kiisalu Danske Rederier-imit paasissutissat pingaarutillit pissarsiarineqarput.

Malitseqartitsisoqassasoq, illuatungeriillu akornanni suleqatigiinneq annertusarneqassasoq isumaqatigiissutigineqarpoq.

Annertunerusumik paasisaqarusukkuit, Naalakkersuisumut allatsi Anders Samuelsen, ansa@nanoq.gl-imut attavigiuk.