Sisimiuni oqaloqatigiiffiusumik ataatsimiinnerit

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ulluni 22. aamma 23. august 2019 Sisimiuni ataatsimiisitsivoq.

Suliniutit najukkami atuutsilerumallugit suliallu akimorlugit suleqatiigittoqalernissaata ilarisaatut soqutigisaqaqatigiit arlallit, tassungalu ilanngullugu GUX-imi ilinniartut oqaloqatigiiffiusumik ataatsimeeqatigineqarput. Nappaatit atoqatigiinnikkut tunillaassuuttut atugaanerujussuat kissaatiginngisamillu naartulertarnerit qanoq pinaveersimatinneqarnissaat inuusuttunit qanoq isumaqarfigineqarnersut tusarnissaa ilinniartut ataatsimeeqatigineranni siunertarineqarpoq. Imminut paaqqutarinissaq inuusuttut akornanni oqallisigineqarpoq, tamatumani imminut akisussaaffigilernerunissamik oqariartuutit Naalakkersuisumut saqqummiunneqarlutik.

Aammattaaq ulloq unnuarlu angerlarsimaffinni pisortat, Peqqinnissaqarfiup immikkoortuini aqutsisut kiisalu utoqqaat angerlarsimaffianni Qupanumi sulisut ataatsimeeqatigineqarput.

Politiit, isumaginninnermi peqqinnissaqarfiullu iluini suliat najukkami immikkoortoqarfiit ulluinnarni innuttaasut akornanni pinaveersaartitsinermik sulianik ulluinnarni isumaginnittuusut peqataaffigisaannik borgmesteri Malik Berthelsen tallimanngornermi ilisimatitsiffiusumik oqaloqatigiiffiusumillu ataatsimeeqatigineqarpoq.

”Najukkami immikkoortortat oqaloqatigiiffiusumik ataatsimeeqatigineri pinaveersaartitsinermik suliaqarneq eqqarsaatigalugu isumaginninnermik peqqissaanermillu suliaqartut suliaat pitsaasumik paasisaqarfigineqarput” taama oqarpoq Naalakkersuisoq Martha Abelsen, nangillunilu:

”Pitsaasumik suliaqarneq tamanna suliffeqarfiit assigiinngitsut akimorlugit iliuuseqarusussuseqartoqarneranik pitsaalluinnartumillu ingerlataqartoqarneranik takutitsivoq”.


Najukkami pinaveersartitsinermik sulianik siuarsaanerup ilaatut Naalakkersuisoq Martha Abelsen 2019-imi septembarip aallartinnerani Upernavimmut tikeraarnissaminik pilersaaruteqarpoq.


Paasisaqarnerujumallutit attavigiuk peqqinnissaq pillugu siunnersorti Aka Olesen oqarasuaatikkut.: +299 34 66 69 imaluunniit e-mailikkut: akol@nanoq.gl