Nunani Avannarlerni Ministerit Siunnersuisoqatigiivi Islandimi ataatsimiittut

Aalisarnermut, Piniarnermut Nunalerinermullu Naalakkersuisup Nunani Avannarlerni Ministerit Siunnersuisoqatigiivi Islandimi ataatsimeeqatigivai

Nunani avannarlerni aalisarnermut, nunalerinermut, inuussutissalerinermut orpippassuaqarnermullu ministerit ukiumoortumik aggustip 26-anni 2019-imi ataatsimiipput. Aalisarnermut, Piniarnermut Nunalerinermullu Naalakkersuisoq Jens Immanuelsen ataatsimeeqataavoq. Islandimi aalisarnermut ministeri Kristján Þór Júlíusson Reykavikkimi ataatsimeersuartitsisuuvoq.

Naalakkersuisoq Jens Immanuelsen oqarpoq:

”Nunanik sanilitsinnik suleqatigiinnerput, ingammik aalisarnermik aamma immamik piujuaannartitsineq tunngavigalugu atorluaanermik aningaasarsiorneq nalitoorujussuusoq, Ministerit Nunani Avannarlerni Ministerit Siunnersuisoqatigiivi ataatsimiinnerminni sussaqarfitsinnik oqaluuserinnimmata pissarsilluaqaanga.”

Ministerit ilaatigut oqaluuserisaasa ilaat tassaapput aalisaatinik immap naqqanut ingitsiinnartarnerup akiorniarneqarnissaa immanilu qassutinik annaasaqartilluni plastikkinik mingutsitsigaluttuinnarneq. Nunarsuatsinni innuttaasut imartanut eqqaasarneq aalisaatinillu immap naqqanut ingitsiinnartarneq ukiuni kingullerni oqaluuserigaluttuinnarpaat ukkatarineqaleriartuinnarlunilu. Soorlu aamma nunatsinni taama pisoqartoq. Ministerit aalajangerput nunat avannarliit aalisarneq pillugu suleqatigiinnerat nanginneqassasoq aalisaatinillu annaasaqartarnerup akiorneqarnissaa pillugu aamma immap naqqanut aalisaatinik ingitsiinnartarnerup akiorneqarnissaa pillugu suleqatigiinneq pillugu nukittorsarneqassasoq.

Ullormut oqaluuserisassani aalisarnermut, nunalerinermut, inuussutissalerinermut orpippassuaqarnermullu 2021-mit 2014-mut suliassanik pingaarnersiuilluni pilersaarusiortoqarpoq.

Oqaluuserineqarmata ukiuni aggersuni suut qitiutillugit tamaviaarunneqassanersut oqaluuserineqarput aamma Nunat Avannarliit apeqqutit sorliit ataatsimoorlutik akissuteqarfigisinnaassaneraat.

Suliassiissutigineqartut tikkuussissapput Nunat Avannarliit qanoq ililluni aalisarnermut, nunalerinermut, inuussutissalerinermut orpippassuaqarnermullu unammillersinnaassuseqartumik tunniussisoqarsinnaanersoq, attanneqarsinnaasumik inooqatigiinnermut aamma Nunani Avannarlerni nukissiutinik mingutsitsinngitsumik atuinermut.

Aamma oqaluuserineqartut ilaat tassaapput silap pissusiata sakkortusigaluttuinnarnera aamma panernersuaqartarnera, silap pissusiata naleqqussarnera aamma CO2 –p nunamut akuliuttarnera, orpippassuit aamma imaq, aamma Nunani Avannarlerni peqqinnartunik inuussutissartalinnik nerisaqartarnissap innersuussutaata nalilersuiffigineqarnera, attanneqarsinnaassusiali aamma oqaluuserineqarluni.

Kunngeqarfiup Nunani Avannarlerni Ministerit Siunnersuisoqatigiivi 2020-mi siulittaasuuffigilissavaa, Naalagaaffeqatigiinnit tassaasunit Kalaallit Nunaannit, Danmarkimit aamma Savalimmiunit siulittaasuunermi pilersaarutigineqartut agguarlugit akiusussaaffigineqassapput.

Naalakkersuisoq Jens Immanuelsen oqarpoq:

“Nuannaarutigaara Naalagaaffeqatigiit siulittaasuulissammata, Kalaallit Nunaanniillu Nunat Avannarliit pitsaasumik suleqatiginissaannut aamma qilanaarpunga. Kalaallit Nunaata siulittaasuunerup nalaani ukkatarissavaa Nunani Avannarlerni inuiaqatigiit sineriammi najugallit attanneqarsinnaasumik siunissami ineriartortitaanissaat.”

Naalakkersuisup Jens Immanuelsenip ataatsimiinnermi ministerit Kalaallit Nunaanni Aalisarneq pillugu Ataatsimiititaliarsuup suliai pillugit ilaatigut ilisimatitsissutigivaa, aamma Kalaallit Nunaat nutaamik immami uumassusilerisumik
umiarsuartaalersoq oqaluttuaraa, aamma Kalaallit Nunaanni aalisarnermik nakkutilliisussatut ilinniartitaaneq nassuiaassuteqarfigivaa. Nunat Avannarliit ilinniartitaanermik aaqqissuussineq tusaramikku nersualaartorujussuuaat.

Paasissutissanik amerlanerusunik paasisaqarusuttoqarpat Jørgen Isak Olsen, Naalakkersuisoqarfimmi pisortaaneq attavigineqarsinnaavoq. E-mail: jio@nanoq.gl