NI Nuummi bacheloritut ilinniakkat kukkusumik neqeroorutigineqartut

Ilinniartitaanermut, Kultureqarnermut Ilageeqarnermullu Naalakkersuisoqarfiup paasivaa Nuummi Niuernermik Ilinniarfik ilinniakkanik nutaanik marlunnik, tassalu Nunat tamat akornanni niuernermik bacheloritut ilinniakkamik aamma Aningaasaqarnermik nukissatigullu sillimmatinik aqutsinermik bacheloritut ilinniakkamik, neqerooruteqartoqarsimasoq. Kisiannili atortussatigut imaluunniit aningaasaliissutitigut ilinniakkat aallartinnissaat akuerisaasunik tunngavissaqanngillat. Imaappoq ilinniarfik maannakkorpiaq inatsisitigut akuerisaasumik ilinniakkat neqeroorutiginissaannut tunngavissaqanngitsoq, ilinniakkallu aningaasaliiffigineqarnikuunatik. Taamaammat NI Nuup ilinniakkat pilersaarutaagaluartut aallartissinnaanngilai.

”Pisimasoq ilungersunarluinnartutut isigivara. Tassami ilinniagaqarniartut ilinniarlutik aallartinnissaminnik takorluuisimagaluartut akunnattoortinneqarput. Ilinniakkat neqerooritiginissaannik suliaqarnermi kukkusoqarsimavoq. Pineqartup iluani inatsisit maleruarnagit pisortat ilinniarfiutaat ilinniakkanik neqeroortussaanngilluinnaraluarpoq,. Qanorpiaq pisoqarsimanera maanna misissorneqarpoq, siunissami taamatut pisoqaqqinnginnissaa qularnaarniarlugu. Uannut Naalakkersuisutut pingaaruteqarluinnartuuvoq inatsisit maleruarneqarlutillu ataqqineqarnissaat, taamaammallu uannut pingaarnerpaavoq, pineqartup iluani malittarisassat tamanut atuuttussamik erseqqissarneqarnissaat”, Ilinniartitaanermut Naalakkersuisoq Ane Lone Bagger oqarpoq.

Ilinniagaqarniartut eqqugaasut, ilinniarnerminni aqqutissanik nutaanik toqqaanissaminnut piaarnerpaamik aqqutissiunneqarlutillu ikiorneqassapput, NI Nuullu tungaaniit ataatsimut isigalugu kingunerisassat sapinngisamik annikinnerpaatinniarlugit suliniuteqartoqarpoq.


Erseqqinnerusumik paasisaqarusuttunit attavigineqarsinnaavoq immikkoortortaqarfimmi pisortaq, Lotte Kjær, lokj@nanoq.gl