Nunat Avannarliit aanngajaarniutit pillugit Nuummi isumasioqatigiinnissaat

Nordiske flag Aggustip ulluisa 27-anniit 29-annut Nunat Avannarliit aanngajaarniutit pillugit 2019-imi isumasioqatigiinnissaanni, Nunanit Avannarlerniit nunatsinniillu immikkut qaaqqusat 45-it peqattaaffigisaanni, imigassamut ikiaroornartumullu tunngatillugu pitsaaliuinermi misilittakkanik paarlaaseqatigiinniarlutik, iliuuserisanik periutsinillu oqaluuserinninniarlutik ataatsimoorneranni, Nuuk qitiussaaq.

- Aanngajaarniutinut tunngatillugu pitsaaliuineq nunatsinni peqqissuunissap siuarsarnissaanut, inuunerissuunissamut inuunerullu naleqassusaanut iliuuseqarnissami pingaaruteqarluinnartuuvoq. Nunani Avannarlerni aanngajaarniutit pillugit isumasioqatigiinneq, imigassamik hashimillu -ajornartorsiutitalimmik atuinermik pitsaaliuinermut tunngatillugu- siunersioqatigiinnissamut pingaarutilimmut periarfissiivoq”, Peqqissutsimut, Isumaginninnermut Inatsisinillu Atuutitsinermut Naalakkersuisoq Martha Abelsen, aggustip ulluisa 27-anni isumasioqatigiinnissami tikilluaqqusisussaq taama oqarpoq.

Nunat Avannarliit aanngajaarniutit pillugit isumasioqatigiinneranni, aanngajaarniutit pillugit ilisimatusarnermi paasisanik -pissutsillu piviusut pillugit ilisimasanik nutaanerpaanik tunngaveqartunik saqqummiussisoqassaaq. Sammisassat tassaapput: Imigassap pissarsiariuminarneranut /ersiinnaneranut tunngatillugu aaqqissuussamik iliuuserisat, imigassartoriaatsit, utoqqaat imigassarlu, cannabis peqqinnerlu.

Innuttaasut aanngajaarniutinik atuinerat pillugu nunatsinni misissuinerit nutaat saqqummiunneqassapput, taamatuttaaq Kofoeds skolip Kommuneqarfik Sermersuumilu Allorfiup Nunanit Avannarlernit peqataasunit paasisassarsiorfiginissaannut aaqqissuussisoqassaaq.

Nunani Avannarlerni aanngajaarniutit pillugit isumasioqatigiittarneq 1984-imiit ingerlanneqarpoq. Nunani Avannarlerni naalagaaffiit oqartussaatitaasa imigassamut ikiaroornartumullu tunngatillugu pitsaaliuinermik suliaqartut akornanni, suleqatigiinnerup attatiinnarnissaa nukittorsarnissaalu, isumasioqatigiinnermi siunertaavoq. Qaaqqusisuuneq Nunat Avannarliit akornanni nikittaanneqarpoq, ukioq mannalu Paarisa isumasioqatigiinnermi Nuummi Hotel Hans Egedemi ingerlanneqartussami qaaqqusisuuvoq.

Tusagassiorfiit isumasioqatigiinnermit tusagassiinissamut tikilluaqqusaapput.


Paasissutissat sukumiinerusut peqqinnissaq pillugu siunnersortimut Lisa Christiansenimut oqarasuaatikkut: +299 34 66 50 imal. e-mailikkut: lich@nanoq.gl attaveqarnikkut pissarsiarineqarsinnaapput.