Sermitsiaq.AG-mi avaleraasartuut pillugit allaaserisamut APNN-imit erseqqissaassut

Aalisarnermut, Piniarnermut Nunalerinermullu Naalakkersuisoqarfimmit (APNN) nutaarsiassaqartitsiviup Sermitsiaq.AG-ip sapaammi aggustip 25-anni allaaserisaanut matumuuna erseqqissaateqassaagut.

Allaaserisaq ” Kalaallit Nunaat EU-p pillaasinnaanera pillugu: Avaleraasartuut pillugit isumaqatigiissummut ilaannginnatta EU-p aalajangiiffigissanngilaatigut” APNN-ip isumagaa naapertorlugu allaaserisaq sammivilertinniarneqarpoq Kalaallit Nunaata EU akerlerigaa, akerleriissutigineqartorlu sakkortusiartuinnartoq. Tamanna eqqunngilaq. Kalaallit Nunaat EU-mut akerleriissuteqanngilaq.
Kalaallit Nunaat nunatut sinerialittut avaleraasartoorniarsinnaasutut 2016-ip ukiaanerani akuerisaavoq. Avaleraasartuut pillugit nunat sineriallit 2014-imi isumaqatiginninniarmata Kalaallit Nunaat alaatsinaattutut peqataavoq. EU, Norge aamma Savalimmiut 2018-ip naanissaata tungaanut avaleraasartoortassat pillugit taamani isumaqatigiissutigivaat. Ajuusaarnarpoq nunat isumaqatigiissummik atsioqataasut avaleraasartoortassat 2018-ip ukiaanerani isumaqatigiissummik sivitsuimmata Kalaallit Nunaat ilaatinneqanngimmat.
Erseqqissaassutigineqassaarli Kalaallit Nunaata pingaarteqimmagu pingaartittuarlugulu avaleraasartoortassat pillugit isumaqatigiissutissamik kinguneqarluartussamik sulissuteqarmat, nunat sineriallit tamaasa peqataatillugit. Taamaalilluni avaleraasartuut pillugit piujuaannartitsineq tunngavigalugu ingerlatsinermut siunissamut qularnaarinninnerussaaq. Kalaallit Nunaata nunat sineriallit suleqatigilluarlugit attavigiuarpai.

Paasissutissat erseqqarinnerusut attaveqarfigiuk Birgitte Jacobsen immikkoortortami pisortaagallartoq: bija@nanoq.gl