Naalagaaffeqatigiinnermi illersornissamut upalungaarsimanermullu suleqatigiinneq nukittorsarneqassaaq

Illersornissamut ministerip Trine Bramsenip taamatullu Nunanut allanut tunngassutilinni Naalakkersuisup Ane Lone Baggerip illersornissamut- upalungaarsimanermullu suleqatigiinneq nukittorsarniarpaat sungiusarnernik amerlanerusunik, pikkorissarnernik ilinniartitaanerullu iluani pitsanngorsaanikkut.


Illersornissaqarfiup upalungaasimanermullu qullersaqarfiup suli annerusumik toqqissisimanissamik isumannaatsuunissarlu nalagaaffeqatigiinnermi annertusassuaat. Taama oqarpoq illersornissamut ministeri Trine Bramsen, Nunanut allanut tunngassutilinni Naalakkersuisoq Ane Lone Bagger peqatigalugu suliaqarfiup suleqatigiinnerunikkut ilinniartitsinerunikkullu nukittorsaaqatigiikkusuttut.

Issittumi Atlantikullu avannaani illersornissaqarfiup nakkutilliinera ukiuni aggersuni pingaaruteqaraluttuinnassaaq issittup sumiiffiata politikkikkut sunniuteqarnerata qaffakkiartornera ilutigalugu. Taama ineriartornerup malitsigissavaa illersornissaqarfiup nakkutilliinera annertusiartortinneqarnissaa. Danskit naalakkersuisuisa issittup eqqisisimasumik sakkulersuuffiunngitsumik ingerlanissaa kissaatigaat, taamaattorli patajaatsuunissaq, isumannaatsuuneq toqqissisimanerlu ingerlatiinnarneqassappata danskit annertunerusumik najuunnissaat pisariaqarpoq.

”Taamaattumik illersornissamut politikkikkut apeqqutit pillugit Kalaallit Nunaat Savalimmiullu akuttunngitsunik qaninnerusumillu oqaloqatigiittarnissaat pisariaqarpoq”
, taama illersornissamut ministeri Trine Bramsen oqarpoq, nangillunilu:
”Sillimaniarnermut politikkimut apeqqutini Kalaallit Nunaanni Savalimmiunilu atorfilittat ineriartortinnissaat kissaatigaara, ilaatigut illersornissamut qaffasinnerusumi ilinniarfimmut isersinnaanngortinnerisigut. Taassuma saniatigut kalaallit qatseerisartuisa ilassutaasunik upalungaarsimanermut ilinniartinneqarnerisa ajornannginnerulernissaat neqeroorutigerusuppara”.

Taamaattumik illersornissamut ministerip kalaallit innuttaasut sakkutuujusussaatitaanermut, taamatullu illersornissap upalungaarsimanerullu iluani annertunerusumik ingerlavissaqarsinnaanerat misissorusuppaa. Taamatuttaaq Upalungaarsimanermut Aqutsisoqarfik piumaffigineqarpoq kalaallit oqartussaqarfii suleqatigalugit kalaallinut qatserisartunut ilinniartitsinerit nutaat kalaallinut qatserisartunut tulluarsakkat inerisakkallu misissorneqassasut, taamaalillutik Kalaallit Nunaanni qatserisartut Danmarkilianngikkaluarlutik pissutsinut tulluarsakkanik ilassutaasunik ilinniartinneqartalernissaat siunniunneqarpoq.

Naalakkersuisup Ane Lone Baggerip suleqatigiinnerunissaq oqaloqatigiinnerunissarlu aamma kissaatigaa ilinniakkat qaffasissusaat annertusarneqarnissaa anguniarlugu.
” Maanna illersornissamut ministeriaqarfimmik suleqateqarnitta pitsaareersup ilinniartitaanermut tunngasutigut pitsanngorsarneqaqqinnissaa nuannaarutissaavoq. Kalaallit Nunaanni ajutoornerit ajunaarnersuillu suliariniarneri immikkuullarissuuvoq.
Taamaattumik ilinniakkat tulluussarlugit sammitinnissaat pingaaruteqarpoq.
Kalaallit Danmarkimi upalungaarsimanermut ilinniariartartut qimuttuitsup ajutoornerisa passunnissaat pisariaqartinngilaat, taarsiulluguli ikuallattunik, annaassiniarnernik, uligussaanernik umiarsuarnillu ajutoortoqarnerani iliuusaasinnaasunik ilinniartinneqarnissaat pisariaqarnerulluni”
, taama Ane Lone Bagger oqarpoq, nangillunilu:

”Naalakkersuisunit upalungaarsimanermut ataatsimut Kalaallit Nunaanni illersornissaqarfimmit ingerlanneqartartut nuannaarutigisorujussuuagut. Danskit kalaallillu upalungaarsimanermik suliaqartortai Illersornissamullu suliaqartortaasa ataatsimut sungiusaqatigiikulanerunissaat kissaatigaarput, taamaalilluta ajutoornerit ajunaarnersuillu suliaqarfiginissaannut pitsaanerusumik suliarineqarsinnaanissaannut pikkorinnerulerumalluta”.

Annertunersumik paasisaqarusukkuit saaffigiuk: Naalakkersuisup allattaa Rosa Thorsen +299 553303, rosath@nanoq.gl