Islandimiit nunatta kujataanut tikeraat

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger aamma Islandimi nunanut allanut tunngasunut naalakkersuisoq Guðlaugur Þór Þórðarson ullumikkut nunatta kujataani seqinnarissuup ataani naapeqatigiipput. Naalakkersuisup Naalakkersuisoqatini Islandimeersoq suliaminnut atatillugu nunatta kujataani ulluni makkunani angalapput, Islandimiut aningaasaliissuteqarsinnaaneri immikkut aallullugu.

Tamatumunnga atatillugu Ane Lone Bagger oqaaseqarpoq ”Island aamma Kalaallit Nunaat pissusissamisoortumik suleqatigiipput, nalilerparalu maanna timmisartut mittarfissaannik suliniutit aallartilerneranni kiisalu Royal Arctic Linep aamma Eimskipip suleqatigiilerneranni, pitsassuarnik periarfissaqartoq suli annerusumik suleqatigiinnitsinni nunatta marluk akornanni nukittorsaanissamut. Nunattalu Reykjavikimi sinniisoqarfia tamatumani pingaaruteqarlunilu pissusissamisoortumik inissisimavoq, suleqatigiinnerup tamatuma ineriartortinnissaani.”

”Nunatta akornanni suleqatigiinnerput ukiuni kingulliunerisuni annertusiartorsimavoq, uagutsinnullu pingaaruteqarpoq ineriartornerup pitsaasup tamatuma nukittorsaqqinnissaa. Islandimiullu aningaasaliisartut ukiuni makkunani aamma Kalaallit Nunaata kujataani inuussutissarsiornermik ineriartortitsinermi akuupput, soqutiginassaarlu isiginnaassallugu suliniutit tamakku ineriartornissaat” oqarpoq Islandimiut nunanut allanut tunngasunik ministeriat Guðlaugur Þór.

Ministerit illugiilluni attaveqatigiinneq nunatta sanileriit marluusut akornanni oqaluuseraat, tamatumani aamma niuerneq, timmisartornikkut takornariartitsinikkullu periarfissat annertunerulertussat, immakkut assartuineq kiisalu annertusisamik suleqatigiinneq ilinniartitaanermi, kulturikkut aamma eqqumiitsuliornikkut.

Ilanngullugulu aamma inuiaqatigiinni inuinnaat kattuffiisa akornanni suleqatigiittarneq kalaallit aamma Islandimiut akornanni oqaluuserineqarput, soorlu Hrokurinn, Røde Kors aamma Kalak.

Ministerillu aamma naatsumik eqqartorpaat issittumi aamma nunat avannarliit akornanni suleqatigiinneq, Kalaallit Nunaata Kunngeqarfiup Danmarkip ilaatut peqataaffigisaa. Nunanut allanut tunngasunut ministerit aamma qilanaaraat naapeqatigeeqqinnissartik ukiumoortumik Nunat Avannarliit Killiit ataatsimiinnerannut atatillugu pisussaq. Tulliani ataatsimiinnissaq taanna naatsorsuutigineqarpoq Nunat Avannarliit Killiit Siunnersuisoqatigiivisa Nuummi oktober 2019-imi ataatsimiinneranut atatillugu pissasoq.

Ministerit akornanni ataatsimiinneq Kalaallit Nunaata Kujataani ingerlanneqarpoq, ilaatigullu tikeraarneqarpoq guldisiorfik Nalunaq, maanna Canadamiut suliffeqarfiutaannit AEX Goldimit ingerlanneqartoq, Islandimiullu soqutigisaqarfigisaat. Guldisiorfik 2013-imili ingerlasimanngilaq, maannali suleriaatsit nutaaliaasut atorlugit ammaqqinniarneqarluni, maanna Islandimioq Eldur Ólafsson pisortaralugu.

Aammattaaq Arctic Primeip suliffissuaataa Nanortalimmi nutaanngorsarneqarnikuusoq pulaarneqarpoq, taanna assersuutissaavoq kalaallit aamma Islandimiut inuussutissarsiornikkut suleqatigiinnerannut, illoqarfimmilu tassani suliffissat aalajangersimasut 30-it pilersinneqarsimallutik, saarulliillu qaffasissumik pitsaassuseqartut tarajortikkat tassani nioqqutissiarineqarput. Kalaallit saarulliutaat pitsassuit pingaartumik Europap kujataani Spaniamuunerusoq tunineqartarput.

Paasisassarsiorluni angalaneq taanna ingerlanneqarpoq siornatigut Islandimiut nunanut allanut ministererisimasaat Össur Skarphéðinsson peqatigalugu, taanna Islandimi suleqatigiissitami siulittaasuuvoq aningaasarsiornikkut aamma kulturikkut Islandip aamma Kalaallit Nunaata suleqatigiinneranut tunngasumik sulianut.

Ane Lone Bagger paasissutissinneqarpoq suleqatigiissitap maannamut isumaliutersuutai pillugit, saqqummiunneqartullu soqutiginartutut naleqquttutullu isigalugit. Ministerit taamaasillutik isumaqatigiissutigaat suleqatigiissitap ingerlaqqittumik ingerlatsineranut tunngatillugu suleqatigiinniarlutik, kalaallillu Islandimi sinniisoqarfiat kiisalu Islandip Nuummi sinniisoqarfia suliniutit ingerlanneqartut pillugit malitseqartitsisassapput.
Aamma Kommune Kujalleq ataatsimeeqatigineqarpoq.

Annertunerusunik paasisaqarniaraanni attavigineqarsinnaavoq Naalakkersuisup allattaa Rosa Thorsen, email: rosath@nanoq.gl