Trumpip tikeraarniarunnaarnera Kim Kielsenip tusaatissatut tiguaa

USA-p præsidentiata Københavinimit tikeraarnissaminik taamaatitsinera Naalakkersuisut siulittaasuata Kim Kielsenip tusaatissatut tiguaa. Taamalu nunatta USA-llu akornanni suleqatigiinnermut sunniuteqarnerlunissaa ilimaginngikkini erseqqissarlugu:

Suliat massakkut ingerlasut naliginnaasut soorunami ingerlaannassapput. Uani amerikamut tunngatillugu aamma amerikkap sinniisoqarfiani Danmarkimiittumut, nunatsinnilu sinniisoqarfiliorniarnerannut atatillugu allanngortitsinngilaq. Pisortatigoortumiguna tikeraarneq unitsinneqartoq,” Naalakkersuisut siulittaasuat Kim Kielsen oqarpoq.

Tikeraarnissaraluamik taamaatsitsineq nunatta USA-llu akornanni suleqatigiinnermut sunniinavianngitsoq Naalakkersuisut siulittaasuat erseqqissaavoq:

Issittoq qangaaniilli ukkatarineqarpoq, silap pissusaata allanngoriartornera ilutigalugu issittumut ukkatarinninneq annertusigaluttuinnarpoq. Taavalu massakkut taanna ukkatarinninneq nunatsinnut saqivoq, taamaalillunilu nunatsinnut toqqaannartumik sammitinneqalerluni. Taanna atorluarnissaa soorunami qularutigineqassanngilaq, periarfissanik assigiinngitsunik  suleqateqarnissatsinnut ammaassisinnaammat, niuernikkut taavalu allatigut,” Kim Kielsen oqarpoq.