Kim Kielsen Nunat Avannarliit ministeriunerisa aasaanerani ataatsimeeqatigiinneranni peqataavoq

Nunat Avannarliit ministeriunerisa aasaanerani Islandimi ataatsimeeqatigiinneranni 20. august 2019-imi Kim Kielsen peqataavoq

Nunat Avannarliit ministeriuneri tallimaasut kiisalu Savalimmiuni, Kalaallit Nunaanni Ålandimilu naalakkersuisut siulittaasui nunat avannarliit ukiumoortumik aasaanerani Islandimi Reykjavikimi 20. august ataatsimeeqatigiipput. 

Naalakkersuisut Siulittaasuata Kim Kielsenip periarfissaq iluatsillugu nunani avannarlerni ministeriunerit naapippai.

”Ataatsimiinnermi peqataaneq nunanilu avannarlerni suleqatit naapinnissaat pingaaruteqarpoq, taamaasiornikkummi nunanik avannarlernik suleqateqarneq, Kalaallit Nunaata nunanut allanut politikkiani qitiulluinnartoq, nukittorsarlugu, tamatuma saniatigut apeqqutit pingaaruteqartut Kalaallit Nunaanut attuumassuteqartut oqallisigineqarlutillu aalajangersaaffigineqarnerini peqataanissaq pingaaruteqarpoq taamak Naalakkersuisut Siulittaasuat Kim Kielsen oqarpoq. 

Nunat pineqartut silap pissusaa, avatangiisit nukissiuteqarnerlu eqqarsaatigalugit ukiorpassuarni suleqatigiissimapput, silaannaallu allanngoriartornerata allannguutigisartagai pillugit ataatsimoorluni iliuuseqarnissaq pisariaqartinneqarpoq. Nunani avannarlerni ministeriunerit aammalu nunat namminersortut pingasuusut pisortaasa Nunani Avannarlerni Ministerit Siunnersuisoqatigiiffiata siunissami periusissaa periarfissaq atorlugu akuersissutigaat, periusissani tassani ilaatigut siunertarineqarluni silap pissusaata piujuartitsinerullu ataatsimoorluni anguniaqarluni sulissutigineqarnissaata annertusarneqarnissaa.

”Naalakkersuisut siulittaasuatut silap allanngoriartornerata kingunerisaanik annertuumik unammilligassaqarnerput isumaqatigaara, isumaqarlungalu silap pissusaanut tunngatillugu nunat avannarliit siuttuullutik iliuuseqartarnissaat pingaaruteqartoq. Tamanna nunarsuup sinneranut takutitsineruvoq malitassaqqissoq. Nunani avannarlerni suleqatigiinnitsinni nutaamik periuseqarnissaq isumaqatigiissuteqarnissaq siunertaavoq, tassani anguniarneqassalluni Nunat Avannarliit tassaassasut nunarsuarmi nunani piujuartitsinermik aallaaveqarlutik ineriartortitsiffiunerpaat", Naalakkersuisut siulittaasuat taamatut ilisimatitsissuteqarpoq. 

Kunngeqarfik Parisimi isumaqatigiissummut tamakkiisumik akuersinngilaq, Kalaallit Nunaanni inuiaqatigiit aningaasaqarnerat eqqarsaatigalugu ineriartoriittuarneqarsinnaanerata qulakkeerneqarnissaa eqqarsaatigalugu. Taamaalilluni Kalaallit Nunaat Parisimi isumaqatigiissummut peqataasut annikilliartortitsinissamik pisussaaffigisassaannut malinnittussaatitaanngilaq. Naak nammineq oqartussaaffigisaminut tunngatillugu tamakkiisumik akuersaanngikkaluarluni Kalaallit Nunaata Silap pissusaa pillugu nunat tamalaat isumaqatigiissutaanni anguniagaasut tapersersorpai, Parisimilu isumaqatigiissummut tamakkiisumik akuersaannginnerup Silap pissusaa pillugu nunat tamalaat isumaqatigiissutaanni Kalaallit Nunaata nalunaaruteqartarnissamut pisussaaffii sunniuteqarfiginngilai.

Taamaattumik Naalakkersuisut annertuumik pilersaarut Nukissiuuteqarnermut imermillu pilersuinermik immikkoortumut eqqarsaatigalugit 2030-p tungaanut atuuttussaq Naalakkersuisut akuerinikuuaat, tassani anguniagaalluni akit appartinneqarnissaat, nukissiuutsinut mingutsitsinngitsunik atuinerulernissaq kiisalu Kalaallit Nunaanni nukissiuutsinik atuinerup nutarterneqarnissaa. 

Tikeraarnermi suliffeqarfiit nukissiutinut tunngasunik suliaqartut kiisalu illoqarfinnut aalisarnermullu tunngasunut nukissiuteqartitsinermi piujuartitsinissamut ineriartortitsisut pulaarneqarput.

annertunerusumik paasisaqarusuttut Reykjavikimi Sinniisoqarfimmi pisortaq Jacob Isbosethsen, jsisi@nanoq.gl aqqutigalugu imaluunniit Nunanut Allanut Naalakkersuisoqarfimmeersoq Upaluk Poppel, upap@nanoq.gl aqqutigalugu attavigisinnaavaat.