Tuttunniarnermi umimmanniarnermilu malittarisassat atuuttut – Ukiaq 2019

Tuttunniarnermut umimmanniarnermullu ingerlanneqartumut atatillugu kiisalu Nuup aamma Upernaviup eqqaanni unioqqutitsinerit pissutigalugit malittarisassat atuuttut APNN-imiit matumuuna erseqqissaatigineqassapput.

 

Upernaviup eqqaani Siggummi umimmanniarneq aggustip aallaqqaataanni aallartippoq inuussutissarsiutigalugulu aamma sunngiffimmi umimmanniarneq oktobarip 15-iat ilanngullugu ingerlassalluni. Akuersissutit killeqartut qinnuteqartitsinikkut makitsinikkullu agguaanneqarnikuupput. Piniarfinni Akia/Maniitsoq-mi aamma Ameralik-mi tuttunniarneq aggustip aallaqqaataani aallartippoq sunngiffimmilu piniartunut oktobarip 31-iat ilanngullugu ingerlassaaq kiisalu inuussutissarsiutigalugu piniartunut decembarip 31-iat ilanngullugu ingerlassalluni.

 

Tassunga atatillugu piumasaqaatit malittarisassallu makku erseqqissaatigineqassapput :

  • Inuit atuuttumik piniarnermut allagartallit aamma 16-ileereersimasut kisimik akuersissutinik qinnuteqarsinnaallutillu pisinnaapput.

  • Inuit atuuttumik akuersissutillit kisimik tuttunik umimmannillu piniaqqusaapput.

  • Akuersissutit inummut atiatigut taasamut taamaallaat atuuppoq allanullu tunniunneqaraniluunniit tunineqarsinnaanani.

  • Qoorortuut tuttunniarnermut atoqqusaasut minnerpaaffiat kal. .222-iuvoq qoorortuullu eqiinnartakkat eqittaannartakkallu atornissaat inerteqqutaavoq.

  • Qoorortuut umimmanniarnermut atoqqusaasut minnerpaaffiat kal. 6,5 x 55-iuvoq qoorortuullu eqiinnartakkat eqittaannartakkallu atornissaat inerteqqutaavoq.

  • Qoorortuut suulluunniit tuttunniarnermut umimmiarnermullu atoqqusaasut nakersarneqarsimassapput paarilluagaallutillu.

  • Umimmattat tuttuttallu neqaat tamarmik pisaqarfimmiit nassarneqartussaapput.  Taamaammat pisaqarfinni neqinik qimatsisarneq inerteqqutaavoq.

  • Akuersissutip pisanik nalunaaruteqarnertalimmik utertinneqarnissaa inatsisitigut piumasaqaataavoq.

 

Taassuma saniatigut nunaminertani piniarfissatut akuerineqarsimanngitsuni taamaattumillu pisassiiffiunngitsuni, soorlu Nunatarsuarmi, Nanortallip eqqaani sumiiffinnilu allani umimmattassiiffiunatillu tuttutassiiffiunngitsuni umimmannik tuttunillu takunniffiusimasuni tuttunniarnissaq umimmanniarnissarlu inerteqqutaalluinnartoq sakkortunerpaamik erseqqissaatigineqassaaq.

 

Paasissutissat erseqqarinnerusut pillugit immikkoortortaqarfimmi pisortaq, Amalie Jessen, Aalisarnermut, Piniarnermut Nunalerinermullu Naalakkersuisoqarfik, oqarasuaat: 34 53 04, e-mail: amalie@nanoq.gl, attaveqarfigiuk.