Ministeriuneq nunatsinnukartussanngorpoq

Danmarkimi ministeriuneq Mette Frederiksen 2019-imi aggustip 18-iani 19-ianilu nunatsinni tikeraartussanngorpoq.

MInisteriunerup Mette Frederiksenip Nuummiinnermini Naalakkersuisut Siulittaasuat Kim Kielsen Naalakkersuisullu sinneri naapissavai. Ministeriuneq Nuummiinnermini suliffeqarfinnut assigiinngitsunut pulaassaaq, aamma Issittumi Sakkutooqarfik alakkarneqartussat ilagissavaat.

Mette Frederiksen ministeriuninngoqqammerluni nunatsinnukartussanngormat tikilluaqqusinnaassagakku nuannaarutigaara. Mette Frederiksen pitsaasumik suleqatigereerparput, siunissamilu suli qaninnerusumik suleqatigilernissarput qilanaaraara,” Naalakkersuisut Siulittaasuat Kim Kielsen oqarpoq.

Mette Frederiksen nunatsinniinnermini Kapisilinnukassaaq tassaaniinnermini meeqqanut angerlarsimaffiup Nuummiittup Meeqqat Illuanniit Kapisilinni aallarsimaartut ornissavai. MInisteriuneq aamma nunatsinni kattuffinneersut suliffeqarfinniillu anginerusuneersut naapinnissaannut periarfissaqartussaassaaq.

Ministeriuneq Mette Frederiksen nunatsinneereeruni Islandiliassaaq nunani avannarlerni ministeriunerit ukiumoortumik ataatsimiinneranni peqataajartorluni Islandimukassaaq.

Sukumiinerusumik paasisaqarusuttut attavigisinnaavaat naalakkersuisumut allatsi Steve Sandgreen oqarsuaatikkut 59 66 59 sianerfigalugu imaluunniiit e-mailikkut allaffigalugu: stev@nanoq.gl