Tusaanngap ammasarfii sivitsorneqarput

Tusaanngap innuttaasut pisariaqartitaannik naammassinninnissaanissaq siunertaralugu ammasarfii sivitsorneqarput. Tusaanngap ammasarfii sivitsorneqarput aamma nunaqarfinni isorliunerusunilu suliniutit pataajaallisarneqarput.

Tusaanngap ammasarfii ulluinnarni nal. 9-22-mut weekendinilu nal. 16-04-mut sivitsorneqarput
Tusaannga februar 2019-imi ammarpoq. Taanna suliniutaavoq nutaaq, tassanilu oqarasuaatikkut siunnersuisarfiit arlallit ataatsimoortinneqarput, ulluinnarnilu ammasarfik akunnernik pingasunik sivitsorneqarpoq aamma sumiiffinni siunnersuisarfiit ilaneqarput. 2019-imut aningaasanut inatsimmut isumaqatigiissut aallaavigalugu Naalakkersuisut aalajangersimapput oqarasuaatikkut siunnersuisarfik Tusaannga patajaallisarniarlugu ammasarfiillu sivitsorniarlugit.

Tunumi Tusaannga aamma nunaqarfiit isorliunerusullu siunnerfigalugit paasissutissiinermik suliniuteqarneq
Tusaanngap ammasarfiinik sivitsuinerup saniatigut nunaqarfiit isorliunerusullu ukkataralugit pitsanngorsaalluni Tusaannga patajaallisarniarneqarpoq. Tamanna piviusumik pissaaq Tunumi Tusannga pilersinneratigut. Taanna immikkoortortaq Tusaanngamut ilassutitut siullermik sapaatip akunneranut akunnerit 2 x 2-t ammasassaaq. Innuttaasut namminneq oqaatsitik atorlugit siunnersortinniarlutik ilitsersorneqarnissarlu siunertaralugu saaffiginnittarsinnaapput. Tamatuma saniatigut Tusaannga pillugu paasissutissiinermik suliniutit patajaallisarneqassapput, taamaalilluni innuttaasut amerlanerusut Tusaanngap siunnersuisarneranik paasisimasaqarnerulerniassammata, matumani imminut toquttarneq, kinguaassiutitigut atornerluineq, persuttaasarneq il.il. pillugit isumaliutersuutit pillugit.

”Takusinnaavarput Tusaannga maanna innuttaasut pisariaqartitaannik naammassinnissinnaalereersimasoq. Taamaattumik misilittakkagut tunngavigalugit Tusaannga annertusivarput, taamaalilluni Tusaannga siammarnerussaaq nunalu tamakkerlugu meeqqanit, inuusuttunit ilaqutariinnillu attavigineqarnerulersinnaassaaq. Innuttaasut Tusaannga suunersoq ilisimasaqarfigissavaat saaffiginnittarlutillu, ajornartorsiutaasa ilaat aaqqiiviginiassagatsigit. Ikiortissarsiorfiusinnaasunik periarfissaqartoq ilisimassavaat, aamma oqaluttuussinnaavagut sumi ikiorneqarsinnaanersut”, Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Tusaanngap upernaaq 2019-imi ammarnerata kingorna 498-inik saaffiginnittoqarsimavoq, amerlanerillu Nuummi najugaqartunit saaffiginnissutaasimapput. Tusaannga innuttaasunut ajornartorsiutit pillugit oqaloqateqarnissamik pisariaqartitsisunut nalinginnaasumik attavigisartakkaminnit imaluunniit najukkaminni ikiorserneqarsinnaasutut misigisimanngitsunut neqeroorutaavoq. Tamatuma saniatigut innuttaasut ajornartorsiutitik pillugit sumi ikiorneqarsinnaanerat ilitsersorneqarsinnaanerallu pillugit Tusaannga innersuussisinnaavoq.

Innuttaasut Tusaannga oqarasuaatikkut 801180 sianerfigisinnaavaat imaluunniit 1899-imut SMS-erfigalugu.






Attavissaq
Paasisaqarnerorusukkuit attavigiuk naalakkersuisup allattaa Inger Heilmann Larsen, e-mail: ihla@nanoq.gl imaluunniit oqarasuaat + 299 554160