Pilertortumik ikiorneqarnissamik pisariaqartitsisunut ikiuiartortartut immikkut ilisimasallit nutaat kommunit sulianik suliarinnittarneranni ikiussavaat

Pilertortumik ikiorneqarnissamik pisariaqartitsisunut ikiuiartortartut immikkut ilisimasallit nutaat kommunit pilertortumik ikiorneqarnissaminnik pisariaqartitsisut ikiortassavaat – ass. kinguaassiutitigut atornerluisoqarsimatillugu suliani annertuuni. Kommunit isumaginninnermi suliassaqarfimmi suliat pisariusut pillugit suliatigut tapersersorneqarnissamik kommunit kissaataat tunngavigalugu pilertortumik ikiorneqarnissamik pisariaqartitsisunut ikiuiartortartut immikkut ilisimasallit pilersinneqarsimapput.

Pilertortumik ikiorneqarnissamik pisariaqartitsisunut ikiuiartortartut immikkut ilisimasallit Pitsaaliuinermut isumaginninnermullu aqutsisoqarfimmiipput, Qitiusumik Siunnersuisarfimmut maanna atuuttumut ilassutaallutik. Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kommuninut suliat naatsorsuutigisimanngisat annertuut pillugit aamma sumiiffinni sulianik suliarinninnermi pilertortumik ikiorneqarnissamik pisariaqartitsisunut ikiuiartorlutik angalasassapput. Ikiuiartortartut pineqartut suliat suliarineqarneranni meeqqap angajoqqaallu peqataasarnerisa patajaallisarnissat ukkataralugu sulisassapput, kommunillu suleqatiginerisigut ikiorsiissutissat eqqortut aallartittarnissaat qulakkeertassallugu.

”Inatsisip unioqqutinneqartarnera Naalakkersuisut akuerisinnaanngilaat. Tamatumunnga peqatigitillugu innuttaasut kommunillu oqariartuutaat soorunami tusarnaartarpagut. Illoqarfinnut minnerusunut ilinniarsimasunik piukkunnartunillu atorfinitsitsiniarnerup ajornartorsiutaanera kommunit uteqattaarlugu oqaatigisarpaat. Ilinniarsimasunik amigaateqarneq innuttaasut ataqatigiinngitsumik sullinneqartarnerannut sunneeqataavoq. Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kommunini suliat pisariusut pitsaanerusumik suliarineqartalernissaannut ikiuutissapput”, Peqqissutsimut, Isumaginninnermut Inatsisinillu atuutsitsinermut Naalakkersuisoq, Martha Abelsen oqarpoq.

Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kinguaassiutitigut atornerluinerit pillugit suliani ammanerulernissamut suleqataassapput. Ikiuiartortartut suliap ingerlanera pillugu meeqqap angajoqqaavisalu peqataatinneqartarnissaat ilisimatinneqartarnissaallu ukkatarissavaat – nalunaarutiginninnermit inissiisoqassappat inissiinissap tungaanut.

”Innuttaasut sumiluunniit najugaqaraluarpata Naalakkersuisut ikiorusuppaat. Kinguaassiutitigut atornerluinerit pillugit nalunaaruteqartarnerit pillugit suliat ingerlarngi tamanut ammanerusariaqarput. Innuttaasut nalunaaruteqarsimagaangamik iliuuseqartoqarneranik misigisaqartarnissaat pillugu peqataatinneqassapput. Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kommunini nalunaaruteqarnerit tunngavigalugit iliuuseqarfiginissaat tapersersuiffigisassavaat. Oqartussaasut marluk akornanni innuttaasut pillugit suliat maangaannaq uninnginnissaat pinaveersaassavarput”
, oqarpoq Peqqissutsimut, Isumaginninnermut Inatsisinillu atuutsitsinermut Naalakkersuisoq, Martha Abelsen.

Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kommunini aqutsisut suleqataasullu suleqatigissavaat. Kommunini sulisut ikiuiartortartut pineqartut isumaginninnermi sulianik suliaqarneranni ikiuuttarnissaat siunertaavoq. Kinguaassiutitigut atornerluinerit pillugit suliani ikiuiartortartut pineqartut kommunini sulisut innuttaasullu suliap aallartinneranit naammassinissaata tungaanut ikiuuttassapput, tassa nalunaaruteqarnermit, politiit apersueqqissaarnerannut, meeqqat angajoqqaallu oqaloqatigineqarnerannut, kiisalu malitseqartitsisarnermi. Pilertortumik ikiorneqarnissamik pisariaqartitsisunut ikiuiartortartut immikkut ilisimasallit meeqqap ukkatarineqarnissaata isumagineqarnissaa aamma meeqqap illersorneqarnissaanik qulakkeerinninneq pillugit suleqataassapput.

“Pilertortumik ikiorneqarnissamik pisariaqartitsisunut ikiuiartortartut immikkut ilisimasallit kommunit piffissaq sivikinnerusoq eqqarsaatigalugu ikiortassagaat siunertaavoq. Taamaattorli erseqqissaatigineqassaaq, suliassat naammassineqarnissaat siunissamut isigaluni kommunit suliassarimmassuk. Taamaattumik pilertortumik ikiorneqarnissamik pisariaqartitsisunut ikiuiartortartut immikkut ilisimasallit suleriaasaat imminut ikiornissamut ikiuinertut pissuseqarnissaa Naalakkersuisut kissaatigaat. Tamanna ima isumaqarpoq, tassa kommunini sulisut ikiuiartortartunit pineqartunit sanileralugu ilinniartinneqartarnikkut ilinniarfigissavaat, taamaalillutik kommunini suleqatit suleriaatsit eqqortut ilisimalissammatigit, siunissarlu ungasinnerusoq eqqarsaatigalugu suliassat nammineq kivissinnaalerlugit”
, oqarpoq Peqqissutsimut, Isumaginninnermut Inatsisinillu atuutsitsinermut Naalakkersuisoq, Martha Abelsen.

Meeqqat tapersersorneqarnissaannut inatsisartut inatsisaat malillugu sulianik suliarinnittarneq aamma sumiiffinni innuttaasunut ikiorsiinissamik periarfissat pilersinnissaat kommunit akisussaaffigaat.

Meeqqat tapersersorneqarnissaannut inatsit pillugu paasisaqarnerorusukkuit uani atuarit inatsisit.gl

Pilertortumik ikiorneqarnissamik pisariaqartitsisunut ikiuiartortartut immikkut ilisimasallit meeqqat inuusuttullu sumiginnagaasut ikilisinniarlugit nuna tamakkerlugu iliuusissatut pilersaarummut ilaassapput, taanna pillugu ukiakkut 2018-imi ataatsimiinnermi imm. 171 Inatsisartunit akuersissutigineqarpoq. Ikiuiartortartut 2020-mi pilersinneqarnissaat naatsorsuutigineqarpoq.

Attavissaq
Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. +299 554160-mut attavigiuk