Eqqaaniut: Atorfilik nutaaliortoq aamma tamatigoortoq qimaguppoq

Namminersorlutik Oqartussani aqutsisoqarfimmi pisortaq, Lise Lennert Olsen toqukkut qimaguppoq. Dronning Ingridip Napparsimaviani 12. august 2019-imi Lise eqqissivoq meeqqani, uini ilaquttanilu qaninnerit najortigalugit. Lise Lennert Olsen kræftimik ajorunnaarsinneqarsinnaanngitsumik nalaanneqarsimavoq

Lise Lennert Olsen 24. juli 1959-imi Sisimiuni inunngorpoq qatanngutigiinnilu 6-iusuni angajullersaalluni.

Lisep qimatarai uini, timmisartunik iluarsaasartoq, Frank Nielsen kiisalu siullermik uiminik qitornani pingasuusut: ingeniøri, Ilannguaq 38-nik ukiulik; ilinniartitsisunngorniartoq, Najaaraq 31-nik ukiulik; ilinniarnertooq, Kira 21-nik ukiulik, kiisalu uimi pania, uumasut nakorsaat, Stella 40-nik ukioqartoq. Lise Lennert Olsenip ernguttatik katillugit arfiniliusut aamma anaanani, ilinniartitsisoq soraarninngorsimasoq eqqartuussisuusimasorlu, Sofie Lennert qatanngutinilu sisamat qimatarai.

Lise Lennert Olsen Sisimiuni realskolemi atuarnini 1976-imi naammassivaa. Viborg Katedralskolemilu qangatoortunik oqaatsinik ilinniareerluni (klassisk sproglig) 1980-imi ilinniarnertuunngorpoq. Taava eskimologimik Århusimi Københavnimilu ilinniagaqarpoq ilinniakkanilu naammassivaa Københavns Universitetimilu 1987-imi kandidatinngorluni.

Ilisimatusarnerup, ilinniartitaanerup, kultureqarnerup aamma ilageeqarnerup iluani inerisaanerit aamma aqutsinerit pingaarnertut suliarisimavai.

1987-imit 1993-ip tungaanut Lise Lennert Olsen Knud Rasmussenip Højskoliani ilinniartitsisuuvoq ukiumilu atuarfiusumi1991/92-imi forstanderimut taartaalluni.  I993-imi Namminersornerullutik Oqartussani taamani Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmi ilisimatusarnermi ataqatigiissaarisutut siullerpaatut atorfinitsinneqarpoq. Tassanilu pisortaqarfimmi 1994-imit 1999-imut ilinniartitaanernut qaffasinnerusunut allaffimmi pisortaavoq. Ukiumi atuarfiusumi 1999/2000-imi Lise Nuummi ilinniarnertuunngorniarfimmi ilinniartitsisuuvoq, ukiumilu atuarfiusumi 2000/2001-imi Danmarks Pædagogiske Universitetimi pisortatut sulinermik ilinniaqqilluni. Lise pisortaqarfimmut uteqqippoq 1. februar 2002-milu ilinniartitaanermut immikkoortortaqarfimmut pisortanngorluni. 1. juni 2002-mi Ilinniartitaanermut, Kultureqarnermut, Ilisimatusarnermut Ilageeqarnermullu Pisortaqarfimmi pisortatut atorfinippoq 1. februar 2008-milu tassani departementschefitut atorfinilluni.

2011-mi upernaakkut Naalakkersuisut nikinneranni Lise Lennert Olsen taamani Ilaqutariinnermut, Kultureqarnermut, Ilageeqarnermut Naligiissitaanermullu naalakkersuisunngortup, Mimi Karlsenip naalakkersuisuuffigiligaanut departementchefinngorpoq. Taassuma kingorna Lise Lennert Olsenip qinerpaa Knud Rasmussenip Højskolianut forstanderitut atorfeqarnissani 1. september 2013-imilu atorfinilluni. 15. Maj 2017 Aningaasaqarnermut Sulisoqarnermullu Aqutsisoqarfimmi sulisoqarnermut pisortanngorpoq kiisalu 3. August 2018-imi aqutsisoqarfimmi tassani pisortanngorluni.

Lise annaavarput. Annaavarput ukiorpassuarni suleqatigisimasaq ikinngutinnertuaannartoq aamma pisortaq immikkut piginnaasaqartoq.  Ilaqutaasut qaninnerpaat annaasaqarneranni misiginneqatigaagut. Qularinngilarput ilaqutaasut tamattalumi Lisemik ilisarisimasaqartut inuttut immikkut nukittussuseqarnerata eqqaaneqarneratigut tuppallersaammik nukissamillu tunineqartarumaartugut. Ullussanilu naatserlugit inoqatiminut asannittuunini isumassuiuarninilu allanngortinngilaa.

Lise, eqqaaneqarnerit ataqqinartuujuaannassaaq iluunngarlutalu qujavugut puigunngisaannartussanngorlutit ilisarisimalersimagatsigit.

Ilinniartitaanermut, Kultureqarnermut Ilageeqarnermullu Naalakkersuisoqarfik