Meeqqanut, inuusuttunut ilaqutariinnullu iluaqutaasussat suliniutit nutaat

Meeqqanut, inuusuttunut ilaqutariinnullu suliniutinik arlalinnik Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen aallartitsitsiniarpoq. Suliniutit piaarnerpaamik piviusunngortinneqassapput, taamaalillutillu innuttaasunut iluaqutaassallutik. 2019-imut aningaasanut inatsimmi isumaqatigiissut kiisalu Kommune Qeqertalimmi Tasiilamilu angalasimanerit tunngavigalugit suliniutit suliarineqarput.

Innuttaasut pitsaanerusumik ilitsersorneqartarnissaat aamma sukkanerusumik sullinneqartarnissaat Naalakkersuisut kissaatigaat.


Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip qanittukkut Tasiilami aamma Kommune Qeqertalimmi angalasimaneranit innuttaasut qisuariaataat pissarsiarisimasai tunngavigalugit suliniutit suliarineqarput. Tasiilami innuttaasut nammineq oqaatsitik atorlugit sulianik ilinniarsimasunik oqaloqatiginnittarnissamik periarfissaqarnissartik ujartorpaat. Kommune Qeqertalimmi innuttaasut Tusaannga aamma oqarasuaat atorlugu siunnersorneqarsinnaanermik periarfissaq ilisimasaqarfiginngilaat.

Suliniutit Naalakkersuisut piviusumik aallartiligaat makkuupput:

Tunumiutut Tusaannga sapaatip akunneranut nalunaaquttap akunnerinik 2 x 2-inik ammasartussaq. Tasiilami tunngavilikkamik Tusaanngap immikkoortuanik immikkut ittumik pilersitsisoqassaaq, taassumalu Tasiilami innuttaasut illoqarfimminni attaveqarfeqarsinnaanngortissavai, taamaalillunilu nammineq oqaatsitik atorlugit oqaloqateqarnissamik periarfississallugit.
Tusaanngap ammasarfiisa ulluinnarni nal. 9-miit 22-imut aamma sapaatip akunnerata naanerani nal. 16-imiit 04-imut sivitsorneqarnerat.
Ammasarfiit sivitsorneqarnerisa innuttaasunit atorneqarsinnaanera pitsaanerulersissavaa. Taamaalilluni sapaatip akunnerisa naaneranni ikiorserneqarnissamik siunnersorneqarnissamillu periarfissaqalissaaq.

Tusaannga pillugu nunaqarfinnut isorliunerusunullu toraagalimmik paasititsiniaanissamik suliniuteqarneq. Tusaannga nunamut tamarmut neqeroorutaavoq. Tusaanngap ilisimaneqarnera annertusineqassaaq, taamaalilluni nunami tamarmi innuttaasut kinaassuseq isertuullugu siunnersorneqarsinnaanermik periarfissaq atorsinnaalerniassammassuk.
Internettikkut quppersagaq meeqqanut, inuusuttunut ilaqutariinnullu toraagalik ilisimatitsissutinik imaqartoq. Meeqqanut, inuusuttunut ilaqutariinnullu ikiorneqarnissamik ujartuineq ajornannginnerulissaaq. Taamaattumik pitsaaliuineq pillugu inuiaqatigiinnut quppersakkamik pilersitsisoqassaaq, tassani innuttaasut illoqarfimminni/nunaqarfimminni ikiorneqarnissamik pissarsiorsinnaalissallutik.
Kinguaassiutitigut atornerluisoqarsimatillugu kommuninut pilertortumik ikiorneqarnissamik pisariaqartitsisunut ikiuiartortussat immikkut ilisimasallit nutaat. Kinguaassiuutitigut atornerluisoqarsimatillugu suliani kommuninut ikiuiartortarnissaq immikkut ilisimasallit ilaatigut suliassaraat. Nalunaarutiginnittoqarnerani, politiinit killisiuisoqarnerani, meeqqanik angajoqqaanillu oqaloqateqarnermi kiisalu malitseqartitsinermi suliap ingerlaarnerani tamarmiusumi kommunini sulisut immikkoortortap ikiortassavai.

Pitsaaliuinermut Isumaginninnermullu Aqutsisoqarfimmiit suliniutit taakku piviusumik aallartissinnaagatsigit nuannaarutigeqaara. Suliniutaapput erngerlutik aallartinneqarsinnaasut inuttaasunullu iluaqutaasussat aammalu innuttaasut kommunillu qisuariaataannik piviusuusunik tunngavillit. Ikiorneqarnissamik, siunnersorneqarnissamik ilitsersorneqarnissamillu innuttaasut periarfissaqassapput. Suliniutit taakku tamarmik tamassumunnga tunngaviliissapput. Peqatigisaanik kommunit ingerlatsivii ikiorsiinissaminnut periarfissarissaarnerulissapput.” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Pitsaaliuinermut Isumaginninnermullu Aqutsisoqarfimmi suliniutit attaveqassapput.

2019-imut aningaasanut inatsisip akuersissutigineqarneranut atatillugu atugarissaarnermut pitsanngorsaatissanut arlalinnut aningaasanik immikkoortitsisoqarpoq, matumani oqarasuaatikkut siunnersuisarfiup Tusaanngap patajaallisarneqarnissaanut aamma suliniutit allat meeqqanut, inuusuttunut ilaqutariinnullu iluaqutaasussat ilanngullugit.


Attavissaq
Paasisaqarnerorusukkuit naalakkersuisup allattaa, Inger Heilmann Larsen, e-mail: ihal@nanoq.gl atorlugu imaluunniit tlf.nr.+299 554160 atorlugu attavigiuk