Qatserisartut danskit 37-t pinngortitami ikuallannermut qatseriartulersut

Sapaatiummat unnukkut Naalakkersuisut Danmarkimi Upalungaarsimanermut Aqutsisoqarfimmut ikiortissarsiorput. Ullumi atortut qatserisartullu Kangerluarsuk Tullermut apuutissapput

Qaammat sinnerlugu Sisimiut avannamut kangiani pinngortitaq annerusoq ikuallappoq. Najukkami upalungaarsimasut qatserillutik annertuumik suliaqarput, aammalu illoqarfiit saniliusut arlallit ikiuulluarput. Kisiannili ikuallattoq killilerniarlugu qaminniarlugulu ikiorseqqinneqarnissaq pisariaqarluinnalerpoq.

Suliniutit pillugit:
Qatserisartut 37-t ullumi tikittussat Issittumi Upalungaarsimasut ataannut inissinneqarlutik sulilissapput, taakkulu namminneerlutik atortut inissinneqarnissarlu isumagissavaat. 

Sakkutuut aamma Issittumi Sakkutooqarfik ilaatigut qatserivissamut assartuussillutik tapersiissapput. Qatserineq najukkami qatserisartut aamma Qeqqata Kommunia qanittumik suleqatigalugit ingerlanneqassaaq.

Danmarkimiit ikiorserneqarnerup sapaatit akunnerinik marlunnik sivisussuseqarnissaa naatsorsuutigineqarpoq aammalu Illersornissamut Ministereqarfik aningaasaliisuussaaq.

Annertunerusumik paasisaqarusunnermi attaveqarfissat:
Pinngortitamut Avatangiisinullu Naalakkersuisoqarfimmi pisortaaneq aamma Upalungaarsimanermut Ataatsimiititaliami siulittaasoq Mette Skarregaard Pedersen, tlf.: 346476 / 529844, e-mail: mesp@nanoq.gl.