Avatangiisinut Aningaasaateqarfiup avatangiisinut suliniutit 21-it aningaasaliiffigai

Plastikkimik atuinikinnerulernissamut atoqqiinermullu, qassutikunik qalluinermut saviminikunillu saliinermut tunngassuteqartunik avatangiisinut suliniutit pingarnertut pitsanngorsaaqataassapput.

Avatangiisinut Aningaasaateqarfiup inuit, suliffeqarfiit kommunellu avatangiisinut suliniutaannut 21-nut 3 mio. koruunit agguarpai. Suliniutit imarivaat plastikkimik atuinikinnerulernissaq, qassutinik qalluinikkut piniariartarfinnillu saliinikkut imaani avatangiisinik eqqiluitsuutitsineq kiisalu eqqagassalerineq pillugu kommunit suliniutaat.

Suliniuterpassuit soqutiginartut taamak amerlatigisut Avatangiisinut Aningaasaateqarfimmiit tapersersinnaagatsigit nuannaarutissaavoq. Soqutiginninneq taamak annertutigisoq inuppassuit avatangiisitsinnut akisussaassuseqarnerannut suliniuteqarnerannullu takussutissaavoq. Avatangiisinut suliniuterpassuit nutaat inernissaasa takunissaat qilanaarivara,” Naalakkersuisut Siulittaasuat Kim Kielsen oqarpoq.

Taassuma saniatigut Avatangiisinut Aningaasaateqarfiup aningaasaataasa ilai nuna tamakkerlugu ikuallaavissat nutaaliat marluk Sisimiuni Nuummilu inissisimasussat pilersinnissaannut aamma immikkoortinneqarsimapput. Nuna tamakkerlugu ikuallaavissat nuna tamakkerlugu eqqagassanik tigooraasassapput, aaqqiissullu tamanna avatangiisinut pitsaanerpaavoq.

Avatangiisinut Aningaasaateqarfeqalernissaq Inatsisartut 2018-imi ukiakkut ataatsimiinnerminni akuersissutigaat, tamannalu nuna tamakkerlugu avatangiisinik pitsanngorsaatissatut suliniarnermut pingaarutilimmik tunngaviussaaq. Avatangiisinut iluaqutaasumik suliniutinut kiisalu avatangiisinut suliniutinut allatut iliuuseqarnissamik misissuinermik imaqartunut ukiut tamaasa aningaasaliisoqartassaaq.


Paasisaqarnerorusuttut attavigisinnaavaat:
Pinngortitamut Avatangiisinullu Naalakkersuisoqarfimmi pisortaq, Mette Skarregaard Pedersen, oqarasuaat: +299 346476, e-mail: mesp@nanoq.gl

Projektit taperneqarsimasut uani takuneqarsinnaapput.