Pele Brobergip Sermitsiaq.AG-kkut oqaatigisaanut oqaaseqaat

Allattoq Naalakkersuisoq Karl Frederik Danielsen

 

“Aggustip ulluisa arfineq aappaanni internetikkut aviisip Sermitsiaq.AG-p allaaserisaq, qulequtalik ”PN: Mittarfiliassanut tunngatillugu Inatsisartut inatsimmik unioqqutitsisinnaasut” saqqummiuppaa.

 

Aallarniutigalugu oqaatigissavara, taamatut oqarneq soorunami ilumuunngimmat. Pele Broberg allaaserisami oqarpoq, mittarfiliortiternerni inuiaqatigiit aningaasaqarnerannut iluanaarutissat uppernarsarneqarsinnaanngitsut.

 

Qaqortumi, Nuummi Ilulissanilu mittarfinnut nutaanut aningaasaliinngikkutta, maanna ilulisiligaanermut aningaasaliisariaqartussaavugut. Maannakkut ilusiligaaneq naapertuutinngilaq, aammalu Inatsisartut tamatuminnga allannguiniarlutik aalajangiisimapput.

 

Mittarfiit nutaat sananeqarnerisigut maanna angallasseriaatsimi, ilaasut amerlanerusunik akunniffigisartagaanni assartuussineq pitsaanerulertussaasoq uppernarsarneqarsimavoq.

 

Pele Broberg Kangerlussuup ullumikkutut 2810 meterimik mittarfeqarluni maanna ingerlanneqarnissaanut tunngavilersuuteqarpoq. Taanna mittarfiliortiternerni aningaasaqarnermik qaangiinermut aamma missingersuusiortarnermut inatsimmik unioqqutitsinermut peqqutaasutut oqaatigineqarpoq.

 

Tamanna ilumuunngilaq.

 

Kangerlussuup siunissami ingerlanneqarnissaata ilusissaa pillugu suli inaarutaasumik aalajangiisoqanngilaq. Naalakkersuisut illersornissaqarfiup Kangerlussuarmiinnissamik kissaateqarnerat tunngavigalugu oqaloqatiginninnernik aallartitsisimapput. Taamatuttaaq suleqatigiissitamik, ilaatigut Qeqqata Kommunianit peqataaffigineqartumik pilersitsisoqarsimavoq.

 

Naalakkersuisut Kangerlussuup siunissami ingerlanneqarnissaata ilusissaanut siunnersuummik aalajangersimasumik saqqummiussinnginnerminni suleqatigiissitap sulinerata inernissaata utaqqineqarnissaa kissaatigaat.

 

Taama ersernerlutsigisunik tunngaveqarluni Naalakkersuisut Inatsisartullu inatsimmik unioqqutitsinerarneqarnerat pisuutitsineruvoq annertooq, nunatsinni innuttaasunut pisariaqanngitsumik nalornilersitsisoq toqqissisimajunnaarsitsisorlu.

 

Pele Broberg-ip tunngavilersuinermini suliat akunnerini naatsorsukkat pingaarutillit arlallit qaangiinnarpai, ajoraluartumillu inerniliissut kukkusoq killiffigalugu.”

 

Annertunerusumik paasisaqarusunnermi: Inussiarnersumik Naalakkersuisup allattaa Anders Samuelsen ansa@nanoq.gl imaluunniit tlf. nr. 345456 aqqutigalugu attaveqarfigeqquneqarpoq.