Avannaani aalisartut amerlatsittorujussuupput

Stemningsbillede Umiatsiaaqqat tunisaat amerlipput, naak Qeqertarsuup Tunuanit qaralittassiissutigineqartut ukiut siuliinut naleqqiullugit ikilineqaraluartut.
Aviisi Sermitsiaq aggustip aappaanni 2019-imi saqqummersoq ilaatigut allappoq Ilulissat eqqaanni aalisartut amerlavallaartut.

Ilulissani KNAPK-ip immikkoortortaani siulittaasup Johan Villadsenip aviisimut ilanngullugu oqaatigaa aalisartut ataatsimoorlutik aalisartillutik aporaattarneri akulikilliartuinnartoq.

Ilumoorpoq aalisarfimmi immikkoortumi 47-mi aalisarsinnaanermut akuersissuteqartut ukiuni kingullerni amerlatsittorujussuummata, Aalisarnermut, Piniarnermut Nunalerinermullu Naalakkersuisoq Jens Immanuelsen oqarpoq.

Ullumikkut umiatsiaaqqamik aalisariummillu aalisarsinnaanermut akuersissutaatillit 1.221-put, 2013-imi 932-usut. Ukiut arfinillit ingerlanerini 289-inik amerleriaateqarlutik.

Umiatsiaaqqamik aalisarsinnaanermut akuersissutaatillit amerlatsinnerpaajupput. Aalisarfimmi 47-mi umiatsiaaqqat ukiut arfinillit matuma siorna 789-iupput, ullumikkut 1.078-iullutik. Amerleriaataat 289-iullutik. 2015-imit 2019-imut umiatsiaaqqat 246-nik amerleriaateqarput.

Aalisariutit meterinik arfinilinnik anginerit amerlassusaat aalisarfigineqartumi allannguuteqanngilaq 143-ullutik.

Aalisarfik immikkoortutut 47-mik pineqartartoq tassaavoq sumiiffik Ilulissanit Upernavimmut pineqartartoq.

Qeqertarsuup Tunuanut Upernavimmullu qaleralittassiissutit ikilipput

Naalakkersuisut siorna aalajangerput aqutsiveqarfinni Qeqertarsuup Tunuani aamma Upernavimmi qaleralittassiissutigineqartut TAC-at, akuerisaasumik pisarineqarsinnaasut, ilisimatuussutsikkut ukiuni tulliuttuni sisamani innersuussisarnernut naleqqussarneqartalissasut.

Aqutsiveqarfimmi Qeqertarsuup Tunuani 2019-imut qaleralittassiissutigineqartut 8.180 tonsiupput. 2018-imut qaleralittassiissutigineqartunut 1.320 tonsinik ikinnerullutik.

Aqutsiveqarfimmi Uummannami 2019-imut qaleralittassiissutigineqartut 9.500 tonsiupput. 2018-imut qaleralittassiissutigineqartunut sanilliullugit allannguuteqarnatik.

Aqutsiveqarfimmi Upernavimmi 2019-imut qaleralittassiissutigineqartut 8.457 tonsiupput. 2018-imut qaleralittassiissutigineqartunut 743 tonsinik ikinnerullutik.

Ilulissani IAPP-ip siulittaasua Johan Villadsen siulittaasua aviisimut ilaatigut oqarpoq Ilulissat eqqaanni qaleralinniarneq ukioq manna pitsaanerusoq siornamut naleqqiullugu.

Kalaallit Nunaanni Aalisarsinnaanermut Akuersissutinik Nakkutilliisoqarfiup kisitsisaatai naapertorlugit Qeqertarsuup Tunuani umiatsiaaqqat aalisariutillu meterinik arfinilinnik anginerit ukioq manna januaarip aallaqqaataanit juulip naaneranut tunisaat katillutik 4.786 tonsiupput, siorna taamaalinerani 4.345 tonsiullutik, 441 tonsinik amerlanerullutik.

Umiatsiaaqqat amerlanerpaanik ukiuni kingullerni tunisaqarnerusarput, ukioq manna tunisaat 2.538 tonsiullutik, siorna 2.046 tonsiusut, amerlariaataat 490 tonsiullutik.

Aalisariutit tunisartagaat allannguuteqarpallaanngillat 2018-imi tunisaat 1.682 tonsiusut ukioq manna 1.703 tonsiullutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaagallartoq, Birgitte Jacobsen. E-mail: bija@nanoq.gl