Erik Jensen-ip Nunanit allamiunut akuutitsiniarnermullu ministeri ataatsimeeqatigaa

Aatsitassanut Suliffeqarnermullu Naalakkersuisup, Erik Jensen-ip, Nunanit allamiunut akuutitsiniarnermullu ministeri Mattias Tesfaye ataatsimeeqatigaa

Aatsitassanut Suliffeqarnermullu Naalakkersuisoq Erik Jensen Nunanit allamiunut akuutitsiniarnermullu ministeri Mattias Tesfaye ataatsimeeqatiginiarlugu ulloq 1. august København-imiippoq. Ataatsimiinnermi siunertaavoq ilaatigut qimaasunik tigusisarneq aamma akuutitsiniarneq aammalu avataaneersut sulisussat pillugit Kalaallit Nunaata inissisimanerata oqaloqatigiissutigineqarnissaa.  

Kalaallit Nunaat ammaffiginnittoq ajornasaanngitsorlu, aamma qimaasunut nunasisunullu tunngatillugu nunarsuarmi avatangiisini suleqataasoq, ataatsimiinnerup nalaani saqqummiunneqarpoq. Kalaallit Nunaata nunani tamalaani pisussaaffiit tamaasa naammassisimavai, ilanngullugu Europami inuit pisinnaatitaaffii pillugit nunani tamalaani isumaqatigiissut, aammalu nunatsinni akuutitsilernissamut inatsimmik nutaamik atuutsitsilernissaq sulissutigalugu. Taamaattoq Naalakkersuisut isumaqarput Kalaallit Nunaannut qimaasunik tigusisoqassappat, tamatuma qanoq aammalu qaqugu pisinnaalernissaanut innuttaasuni oqallinnissaq taamatullu politikkikkut isummernissaq, pisariaqartoq, tassami Kalaallit Nunaanni tigusinissaq suli piareersimaffigineqanngilaq.

Kisianni qimaasut annertunerusumik tikeralissagaluarpata, tamanna Kalaallit Nunaanni aningaasaqarnikkut nanertuutaalersinnaassaaq, taamaattumillu Erik Jensen-ip oqaatigaa, nunanit allamiunut suliassaqarfik akisussaaffigilerlugu tiguneqarsimanngimmat, Kalaallit Nunaanni naalakkersuisut isumaqartut tamanna, tamatumunngalu aningaasaqarnikkut pisussaaffiit malittaasut, suli Danmarkip ataaniittut.

Taamaattoq pissutsit pillugit pilersitsiviulluartumik oqaloqatigiinnissaq Kalaallit Nunaannit kissaatigineqarpoq, aammalu Erik Jensen paasissutissiivoq, tamakkiisumik namminiilivinnissap angunissaanik ilungersuuteqarnermut ilaatillugu nunanit allamiunut suliassaqarfiup akisussaaffigilerlugu tiguneqarnissaa, siunissami Kalaallit Nunaannit siunnerfigineqartoq, kisianni tamatumani soorunami Kalaallit Nunaanni aamma Kalaallit Nunaata aammalu Danmarkip akornanni politikkikkut/aningaasaqarnikkut erseqqinnerusumik oqaloqatigiinnissaq pisariaqartoq.

Kalaallit Nunaanni aningaasarsiorneq ingerlalluarpoq aammalu inuussutissarsiortut il.il. avataaneersunik sulisussarsiornissamik annertuumik ujartuipput, tassami pisariaqartinneqartunik nunap iluani sulisussaqanngimmat. Erik Jensen paasissutissiivoq Kalaallit Nunaanni pissutsit pitsanngorsarniarlugit suliniuteqarnerit ingerlanneqartut, kisianni tamanna ajornaatsuinnaanngitsoq aammalu piffissamik atuiffiusussaasoq. Taamaattumik Naalakkersuisut avataaneersunik sulisussarsinissamut periarfissaq annertusarniarpaat, taamaalilluni aningaasaqarnikkut siuariartortoqarnera attatiinnarneqarsinnaassalluni.

SIRI-mut (Styrelsen for International Rekruttering og Integration), sulisussanut avataaneersunut nunamiinnissamut sulinissamullu akuersissutinik allaffissornikkut aqutsinermik/suliassanik suliarinninnermik suliaqartartumut, maannakkut oqaloqatiginninneq pitsaasuuvoq, kisianni allaffissornikkut oqimaalluni. Piffissaq suliassanik suliarinninnermut atorneqartussat sivikillisariaqarpoq, taamaattumillu allaffissornikkut sulianik ingerlatitsinerit pisariillisarneqarnissaannut periarfissat imaluunniit Savalimmiuni atorneqartup fast-track-inut aaqqissuussinerup, soorunami Kalaallit Nunaanni pissutsinut naleqqussalugu, atuutsinneqalernissaa Erik Jensen-ip ujartorpaa.

Savalimmiuni fast-track-inut aaqqissuussineq suliffissaaleqisut procentiannit iluarsineqartarpoq aammalu suliffeqarfiit piumasaqaatit aalajangersimasut naammassisimagunikku, assersuutigalugu aningaasarsianut tunngasut, sulisussanik avataaneersunik tigusinissamut sioqqutsisumik akuerineqarsinnaapput. Kingulliullugu taaneqartup kingunerisaanik ilaatigut nunamiinnissamut/sulinissamut akuersissutip suliarineqarnerata ingerlanneqarnerani, sulisut nutaat taakkua sulillutik aallartissinnaapput. Tamanna maannakkut pisanngikkaluarpoq, kisianni suliniutit taakkua suliffeqarfiit utaqqisarnerannik sivikillisitsisinnaassapput aammalu piffissaq suliassanik suliarinninnermut atorneqartoq nalinginnaasoq annertuumik sivikillisissinnaassallugu.

Mattias Tesfaye ataatsimut isigalugu Kalaallit Nunaata inissisimaneranut paasinnittorujussuuvoq, aammalu erseqqinnerusumik attaveqarnissaq pillugu atorfilittat isumaqatigiissuteqarfigineqarput, taamaalilluni pissutsit qanoq iliorluni aalajangersimasunik pitsanngorsarneqarsinnaanersut misissorlugu aallartittoqarsinnaalissalluni. 

Sukumiinerusumik paasisaqarusuttut naalakkersuisoqarfimmi pisortaq Jørgen T. Hasmmekn-Holm attavigisinnaavaat oqarasuaatikkut 55 24 66-imut sianerlutik imaluunniit e-mailikkut allaffigalgu: joeh@nanoq.gl