eGUX-ersimanermut uppernarsaatit siulliit GUX Sisimiuni tunniussuunneqassapput

Oqaluttuarisaanitsinni siullerpaamik ukiumi atuarfiusumi 2018/19-imi GUX Sisimiut ilinniarnertuunngornianut najugaqarfigisamiiginnarluni ilinniartitaanertut ilinniagassanik ataasiakkaanik tapertaliussassanilluunniit neqerooruteqartalerpoq. Tassa imaappoq, ilinniarnertuunngorniaat illoqarfigisaminnit atuartitsinernut malinnaasinnaallutik Sisimiunilu atuarfimmukaqqaartariaqarnatik. Maani aasaanerani taakku ilinniarnertuunngorniat internetsikkut soraarummeerutissatik naammassivaat. Assersuutigalugu ilinniarnertuunngorniat ilaat Ilimanami, Maniitsuimi Ilulissanilu soraarummeeqatigiipput. eGUX suliniummi nunatsinni sumiiffiit ilinniarnertuutut ilinniarfigineqarsinnaasut amerlanerpaatinniarneqarput. Suliniut suli ineriartortinneqarpoq tamannalu ukioq manna siullermeerineq soorunami malinnaavigeqqissaarneqarpoq – maannalu angusat siulliit paasivagut.

”Internetsikkut ilinniartitsinerup aallartilluarsimagatsigu nuannaarutigaara neriuppungalu massuma GUX-imi suliniutip nalilersoqqittarnerisigut ilinniarfinnut allanut assingusunut atorsinnaalerumaaripput. Tamannami nunatsinni sumiiffinni tamani ilinniartitaanerup ineriartorneranut tapertaalluassaaq.” taama oqarpoq Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger.

Ukiumut siullermut nalilersuinerni paasivarput, ilinniarnertuunngorniat eGUX-imut karakteri GUX-imut nalinginnaasumut sanilliullugit naleqatigigaat, ilaannilu qaffasinnerulaartarlutik. Internetsikkut ilinniarnertuunngorniat nunaqarfimminni illoqarfimminniluunniit ilinniartitaanertut ilinniagassanik ataasiakkaatut tapertaliussassatulluunniit ilinniartinneqarsimapput makkuninnga: danskisut A, matematik B, tuluttut B imaluunniit biologi C.

Ilinniartitsisut ilinniarnertuunngorniallu ukiumi siullermi suliaat annertooq ataatsimut isigalugu censorinit iluarineqarpoq, naak siullermik misiliinermi suut tamarmik pilersaarutit malillugit ingerlasimanngikkaluartut. Nalilersuinermi teknikkumut, allaffissornermut imarisanullu tunngasut sulissutigeqqinneqarsinnaasutut isiginiarneqarput, maannalu eGUX-ip ingerlariaqqinnissaanut kaammattuutitsiaalaat atulernissaannut sulineq aallartereerpoq.

Aappaagu suli pissanganarnerussaaq
Aasaanerani atuanngiffik qaangiuteriarpat klassit siulliit marluk ukiuni marlussunni eGUX-itut GUX-ertussat aallartissapput - taanna taaneqartarpoq ukiuni marlunni eGUX. Ukiuni marlunni eGUX-imi ilinniartoq illoqarfini nunaqarfiniluunniit qimanngikkaluarlugu ilinniarnertuutut soraarummeersinnaavoq. Ukiuni marlunni eGUX pingaartumik ingerlariaqqiffiusumik ilinniarfinnut sivikitsunut akunnattumillu sivisussusilinnut qinnuteqarnissamut periarfissatsialaavoq.

Paasisaqarnerorusukkuit Naalakkersuisup allattaa Rosa Thorsen e-mail: rosath@nanoq.gl aqqutigalugu allaffigiuk.