Station Nord killeqarfittut ikaarfissatut akuerineqarpoq

Nunanut allanut akuutitsilernissamullu ministereqarfiup (Udlændinge- og Integrationsministeriet) ulloq 29. juli 2019 Station Nord killeqarfittut ikaarsaarfissatut akuerisimagaa, Aatsitassanut Suliffeqarnermullu Naalakkersuisup Erik Jensen-ip nuannaarutigeqalugu nalunaarutigisinnaavaa.

Akuersissuteqarneq Naalakkersuisut kissaateqarnerat malillugu pivoq, aammalu danskit oqartussaasuisa tungaanniit sukkasuumik sunniuteqarluartumillu suliassamik suliarinninnerup inerneralugu.

Nunamit Schengen-imi suleqatigiiffimmi ilaalersimanngitsumut tassanngaaniillu Kalaallit Nunaannut tikinneq aammalu Kalaallit Nunaannit aallarneq tamatuma kingorna Station Nord aqqusaarlugu pisinnaalissaaq.

Akuersissuteqarneq atugassarititaasut makkua tunngavigalugit akuerineqarpoq:
1) Schengen-imut killeqarfikkut avallikkoorluni tikinnissamut aallarnissamullu atatillugu nakkutilliinissamut periafissaqarnissaq eqqarsaatigalugu, Naalagaaffimmi politiinit inassuteqarneq malillugu Nunanut allanut akuutitsilernissamullu ministereqarfiup aalajangersagaasa naammassineqarnissaasa/malinneqarnissaasa isumaginissaanut Station Nord pisussaaffeqarpoq.

2) Suliat ingerlanissaannut tunngasut nakkutilliinermi iliuusissat, Danmarkip Schengen-imi suleqatigiinnermi peqataaneranit pisussaatinneqartut, pillugit killeqarfimmi ikaarfissanik atuisunut nalinginnaasumik paasissutissiisarnissaq – Kalaallit Nunaanni Politimesteri suleqatigalugu pisinnaasoq – Station Nord-ip pisussaaffigaa.

Aammattaaq tunngavissaatinneqarpoq, sumiiffimmi ilanngaaserinermik suliaqarnerup isumagineqarnissaanut tunngatillugu Kalaallit Nunaanni Akileraartarnermut Aqutsisoqarfiup aamma Station Nord-ip akornanni suleqatigiinneq aallarnisarneqassasoq.

Station Nord-ip killeqarfimmi ikaarfissatut akuerineqarnissaa ilaatigut ilisimatuunit aamma aatsitassarsiorfiutileqatigiiffinnit Tunup avannaani suliaqartunit ujartorneqarsimavoq, aammalu taakkua annertuunik sipaaruteqarnerannik kinguneqassalluni, tassami akuerineqarnerata kingorna assersuutigalugu Svalbard-imit Kalaallit Nunaannut angalasoqarsinnaalissaaq.

Paasissutissanik annertunerusunik piniarnermi Aatsitassanut Suliffeqarnermullu Naalakkersusoqarfimmi pisortaaneq Jørgen T. Hammeken-Holm, attavigineqassaaq oqarasuaammut: +299 34 68 46 Mail: joeh@nanoq.gl