Aatsitassanut Suliffeqarnermullu Naalakkersuisoq, Erik Jensen, København-imi amerikamiut ambassadøriannut Carla Sands-imut tikeraarpoq

Amerikamiut ambassadøriata Carla Sands-ip sapaatip akunnera kingulleq Kujataanut tikeraarnera malitseqartillugu Aatsitassanut Suliffeqarnermullu Naalakkersuisoq, Erik Jensen, sisamanngormat ulloq 1. august, aatsitassanut suliassaqarfimmut nalinginnaasumik, pingaartumillu Kujataani paasissutissanik katersilluni ingerlataqarnernut ataatsimoorussanut amerikamiut soqutiginninnerisa nammineerluni malinnaaffiginissaanut periarfissaqalerpoq.

Aatsitassanut Suliffeqarnermullu Naalakkersuisoq tassunga atatillugu oqarpoq:

”Aatsitassanut suliassaqarfimmi amerikamiut soqutiginninnerulernerat malinnaaffigalugu pissaganarpoq. Soqutiginninnerup aalajangersimasunut tunngassuteqarluni paasinarsisinneqarnerunissaa neriuutigaara aammalu Kalaallit Nunaanni inatsisit ataqqillugit aammalu paasiuminartumik suliassaqarfik ineriartortinneqarsinnaassasoq, soorunami Naalakkersuisut tungaanniit piumasaqaateqarlunga.”