Aatsitassanut Suliffeqarnermullu Naalakkersuisoq, Erik Jensen, Nykøbing Falster-imi Multicenter Syd-mut tikeraarpoq.

Multicenter Syd tassaavoq tunisassiornermut atuarfik ukiut 30-it sinnerlugit ingerlasimasoq aammalu maannakkut Danmarkimi tunngaviusumik ilinniartitaanermut suliassaqarfiup iluani iluarsaaqqinnermik aallartitsinissamut politikkikkut oqaluuserisassani nutaani ilaatinneqarnissamut piareersimalluni.

Inuusuttut siunissami sussanerlutik nalorninerusartut danskit periaasiini qanoq isumagineqartarnersut paasiniaanissaq tikeraarnermi siunertaavoq. Atuarfimmi pisortaq Tina Østergaard angalaarussilluni takusaatitsisuuvoq, Guldborgsund kommuniani borgmesteri John Brædder, tamatuma kingorna ilanngulluni.

Atuarfinnut suliassaqarfimmi angalaarussisoqarluni takusaatitsisoqarpoq. Tassani init atuartitsiviusartut takusartinneqarput, aammalu atuagarsorluni atuartitsinissaq siunnerfigineqarani kisianni ilaatigut nerisassiornerup, saviminernik saffiugassanillu suliarinninnerup, motoorinik ilinniarnerup, toqqorsivinni aqutsinerup il.il. iluanni suliaqarneq atornerullugu, atuarfimmi ulluinnarni qanoq atuartitsisoqartarnersoq, taakkunani takutinneqarluni.

Aatsitassanut Suliffeqarnermullu Naalakkersuisoq tassunga atatillugu oqarpoq:

”Atuagarsornermik toqqaannartumik piginnaasaqarnissaq piumasaqaataatinnagu Kalaallit Nunaanni atuartitsineq qanoq uagut nammineerluta ineriartortissinnaaneripput, aammalu inuusuttut ulluinnarni ajornartorsiortartut qanoq iliorluta akuutilersinnaanerlutigu, nalilersuinissamut tikeraarneq tunngavissiivoq.
Suliffeqarnermi illuatungeriit aamma kommunit oqaloqatigisarneri ingerlateqqikkusuppakka, taamaalilluta ataatsimoorluta inuusuttut pisortanit pilersorneqartut, Kalaallit Nunaanni assingusumik pilersitsinikkut, suliffeqalersissinnaaniassagatsigu. Kisianni taamaaliussagutta piareersarluartariaqarpugut aammalu aningaasaqarneq isumaqatiginninniutigalugu inissitsittariaqarlutigu.”