Kalaallit Nunaanni Pinngortitamut Avatangiisinullu Nersornaat 2019 Qeqertarsuatsiaanut innuttaasunut tunniunneqarpoq

Kalaallit Nunaanni Namminersorlutik Oqartussanit Pinngortitamut Avatangiisinullu Nersornaat 2019 ullumi Qeqertarsuatsiaani innuttaasunut tunniunneqarpoq

Naalakkersuisut Siulittaasuata Kim Kielsenip Namminersorlutik Oqartussanit Pinngortitamut Avatangiisinullu Nersornaat Nunaqarfinni Aqutsisunut siulittaasup tullianut Gertrud Hendriksenimut, Qeqertarsuatsiaani innuttaasut sinnerlugit tigusisumut tunniuppaa ima oqaasertalerlugu:

Naalakkersuisut sinerissami angalasarnerminni nunaqarfiit avatangiisiminnut pinngortitamullu paaqqutarinninnerat nalilersortarsimavaat. Naalakkersuisuniillu maluginiarsimavarput nunaqarfik Qeqertarsuatsiaat qanoq eqqiluitsiginersoq. Ukiuni kingullerni nunaqarfissi salingaatsuutinnissaa ineriartortissimavarsi. Tamannalu takullugu nuanneqaaq. Pisussaaffeqarpugut kinguaagut eqqarsaatingalugit salingaatsuutitsinikkut malingassiuissalluta, oqarusuppungalu ilissi Qeqertarsuatsiaarmiut malingassiuisuuvusi, taamaattumillu nuannaarutingaara Pinngortitamut Avatangiisinullu Nersornaat 2019 ilissinnut tunniussinnaangakku.

Namminersorlutik Oqartussanit Pinngortitamut Avatangiisinullu Nersornaat inunnut, sullissivinnut imaluunniit kattuffinnut, maligassiusinut aammalu sullissilluartunut tamatsinnit pinngortitap avatangiisillu eqqummaffiginissaanut kivitseqataasunut imalunniit suliniuteqarnerminni Kalaallit Nunaani avatangiisit pitsanngorsarniarlugit aalajangersimasunik suliniuteqartunut nersorinnissutitut tunniunneqartarpoq.

Namminersorlutik Oqartussat Pinngortitamut Avatangiisinullu Nersornaat 2019, 20.000 koruuninik malitseqarpoq.

Annerusumik paasisaqarusunnermi attaveqarfissaq:

Pinngortitami Avatangiisinullu Naalakkersuisoqarfimmi Pisortaq Mette Skarregard Pedersen, tlf.: 346476,  e-mail: mesp@nanoq.gl

 

Naalakkersuisut Siulittaasuat Qeqertarsuatsiaarmiullu / Formanden for Naalakkersuisut med borgerne i Qeqertarsuatsiaat


Naalakkersuisut Siulittaasuat Kim Kielsen aamma Nunaqarfimmi Aqutsisut Siulittaasuata tullia Gertrud Hendriksen / Formanden for Naalakkersuisut Kim Kielsen med næstformand for Bygdebestyrelsen Gertrud Hendriksen

 

Naalakkersuisut Siulittaasuata akissarsiassaq tunniuppaa / Formanden for Naalakkersuisut overrækker prisen

 

Ane-Marie Johnsen, Qeqertarsuatsiaarmiut utoqqartaasa ilaat:

"Ilitsoqqussaraarput aasakkut nunaqarfipput nunaqqatitsinnit salinneqartartoq, tamannalu uagut kinguaatsinnut ingerlateqqipparput. Nuannersumik isigisaqarusulluta nunaqarfipput ukiut tamaasa aasaanerani salittarparput, taamaasillutalu nuanneqisumik nunaqqatigiit ataatsimuualaartarluta."

 



 

Kim Kielsen Qeqertarsuatsiaani / Kim Kielsen i Qeqertarsuatsiaat