2019-imi kapisilinniartut tamarmik akuersissutaateqartussaapput


Aalisarnermut, Piniarnermut Nunalerinermullu Naalakkersuisoqarfimmiit eqqaasitsissutigissavarput kapisilinniarneq pillugu nalunaarut 2018-imeersoq naapertorlugu kapisilinniartut tamarmik, sunngiffimmi inuussutissarsiutigalugulu aalisartut, kapisilinniarnissamut akuersissuteqarlutik aalisassammata.

Nalunaarummi piumasarineqartoq pingaarutilik tassaavoq sunngiffimmi aalisartut akuersissuteqarlutik kapisilinniarnissaat.

Nalunaarummut aamma ilanngunneqartoq tassaavoq 2019-imi kapisilinniarnissamut akuersissummik tunniussisoqarsinnaanngimmat, ukiup siuliani akuersissuteqarluni kapisilinniarsimasoq pisaminik KANUAANA-mut nalunaaruteqarsimanngippat.

Nalunaarusiortussaatitaaneq

Kikkulluunniit kapisilinniarnissamut akuersissutaateqartut kapisilinnut qassutiminnik napitaajaareersimatillutik KANUAANA-mut pisatik pillugit nalunaarutigisussaavaat. Pisaqarsimanngikkaluaraanniluunniit nalunaarutiginnittoqartassaaq, nalunaarsuiffimmut 0-mik nalunaartoqassalluni.

Kapisilinniarnissamut akuersissuteqartut aalisarsimanngikkaluarunilluunniit aamma nalunaartussaatitaapput, pisaqarsimannginnertik nalunaartussaallugu.

Inuussutissarsiutigalugu sunngiffimmilu aalisartut kapisilittaminnik nalunaarsuisussaanertik naapertorlugu nalunaarsuisimanngippata, aappaaguani kapisilinniarnissamut akuersissummik tunineqarsinnaanngillat.

2018-imi kapisilinniarsimanerit pillugu nalunaarutiginnissimanngikkuit KANUAANA-mut nalunaarutiginnissinnaavutit, ugguuna gflk@nanoq.gl, Fax 34 63 60 imaluunniit Postboks 501, 3900 Nuuk.

Kapisilittarisimasatit immersuiffissamut nalunaarutigissavatit; immersugassaq uaniippoq

Ukioq manna pisassiissutit aamma kapisilinniarnerup aallartiffissaa

2019-imi kapisilittassiissutit 19,5 tonsiupput. North Atlantic Salmon Conservation Organizationimut (NASCO) isumaqatigiissut naapertorlugu ukioq manna kapisilittassiissutit ikinnerutinneqarput, 2018-imi kapisilittassiissutit qaangerlugit aalisartoqarsimammat.

Kapisilittassiissutit 19,5 tonsit inuussutissarsiutigalugu sunngiffimmilu aalisartut kapisilinniarnissaminnut akuersissuteqartut paggatassiissutitut aalisassavaat.

Kapisillit Kalaallit Nunaata Kitaani aalisarneqarsinnaanerisa aqunneqarnissaannut, NASCO-mik isumaqatigiissut naapertorlugu, kapisillit Kalaallit Nunaanni taamaallaat nerineqartussatut pineqartut aalisarneqarsinnaapput – nammineq pisariaqartitat tunngavigalugit aalisarnerulluni.

Isumaqatigiissut naapertorlugu nunarput pisussaaffilerneqarpoq kapisillit nunanut allanut niuerutigineqassanngitsut, namminerli pisariaqartinneqartut aalisarneqarneqartassasut.

Nalunaarut naapertorlugu inuussutissarsiutigalugu aalisartut kapisilittatik najukkap kalaalimineerniarfiani taamaallaat tuniniarsinnaavaat. Kapisillit neriniartarfinnut, napparsimavinnut assigisaannullu toqqaannartumik tuniniarneqarsinnaanngillat.

Sunngiffimmi aalisartut namminneq nerisassaminnik taamaallaat aalisarsinnaassapput.
Kapisilinniarneq aggustip 15-iannit oktobarip 31-annut pissaaq, kapisilittassiissutilluunniit nunguppata aalisarneq unitsinneqassalluni.

Attavigineqarsinnaavoq Katrine Kærgaard, Aalisarnermut, Piniarnermut Nunalerinermullu Naalakkersuisoqarfimmi siunnersortit pisortaat. Email: katk@nanoq.gl